लोकप्रवाह, चोपडा दि. १० डिसें. (संदिप ओली) – घरी एकटी असलेल्या अल्पवयीन सहा वर्षीय बालिकेला बोरं खाण्याकरीता देण्याचे आमिष दाखवून तिला गावाबाहेर निर्जनस्थळी नेऊन तिचे हातपाय बांधून विनयभंग करून अत्याचार करण्याच्या तयारीत असतांना घटनास्थळावर ७८ वर्षीय वृद्ध भाऊलाल कोळी आल्याने आरोपी पळून गेल्याची घटना आडगाव (ता.चोपडा) येथे अकरा महिन्यांपूर्वी घडली होती. याबाबत चोपडा शहर पोलीस स्टेशनला पोक्सो कायद्याअंतर्गत विनयभंगाचा गुन्हा दाखल करण्यात आला होता. सदर खटल्याचे कामकाज अमळनेर जिल्हासत्र न्यायालयात अंडर ट्रायल चालविण्यात येऊन आरोपीला सात वर्ष सक्तमजुरीची शिक्षा सुनावण्यात आली. हा ऐतिहासिक निकाल जिल्हा सत्र न्यायाधीश- २ पी.आर.चौधरी यांनी दिला.
याबाबत सविस्तर वृत्त असे की, चोपडा तालुक्यातील आडगाव येथील मोलमजुरी करणाऱ्या आदिवासी कुटुंबातील आई व वडील कामाला गेले असतांना त्यांची सहा वर्षाची अल्पवयीन मुलगी एकटी घरी असल्याचे पाहून गावातील बाबुलाल बारकू भिल (३०) हा तरुण घरी आला यावेळी त्याने अल्पवयीन बलिकेला बोरं खायला जाऊ असे आमिष दाखवून तिला गावाबाहेर नाल्यात निर्जनस्थळी नेऊन तिचे हातपाय बांधून अत्याचार करण्याच्या तयारीत असतांना त्याच रस्त्याने शेतातून घरी जाणाऱ्या ७८ वर्षीय वृद्ध भाऊलाल कोळी यांना लहान मुलीच्या रडण्याचा आवाज आल्याने त्यांनी त्या दिशेने पुढे जाऊन बघितले असता तिथे बाबुलाल बारकू भिल हा अल्पवयीन बालिकेचा विनयभंग करतांना दिसला. वृद्धाला बघून आरोपी घटनास्थळावरून पळून गेला. त्यानंतर त्यांनी लहान बालिकेला घरी आणून कुटुंबियांना घटनेची माहिती दिली
या प्रकरणातील प्रत्यक्षदर्शी साक्षीदार भाऊलाल कोळी यांना लकवा झाला होता. न्या.पी. आर. चौधरी यांनी कोर्ट कमिशनर अॕड. आर. व्ही. निकम व दोन्ही पक्षांच्या वकीलांना भाऊलाल कोळी यांच्या घरी जाऊन जवाब नोंदविण्याचे आदेश दिले. त्यानुसार बेडवर असलेल्या साक्षीदाराचे त्याच्या घरी जाऊन जवाब घेण्यात आले.
याबाबत पीडितेच्या आईच्या फिर्यादीवरून शहर पोलीस स्टेशनला दि. ११ जानेवारी २०२२ रोजी गुरनं.९/२०२२ अन्वये भादवि कलम-३५४ (ब),(ड) पोस्को कायदा ८ व १२ नुसार बाबुलाल बारकू भिल (२९) रा.आडगाव याच्या विरुद्ध गुन्हा दाखल करण्यात आला होता. त्यानंतर तपास अधिकारी पोलीस उपनिरीक्षक घनश्याम तांबे, पोहेकाँ. प्रदीप राजपूत यांनी फरार आरोपीला आठ दिवसात अटक करून अवघ्या पाच दिवसात न्यायालयात दोषारोप पत्र दाखल केले होते. सदर खटल्याचे कामकाज अमळनेर येथील जिल्हा सत्र न्यायालयात अंडर ट्रायल चालवून साक्षीदारांची साक्ष व तपासी अधिकारी घनश्याम तांबे यांनी केलेला गुन्ह्याचा तपास ग्राह्य धरून आरोपीला कलम ३५४ प्रमाणे सात वर्षाची शिक्षा व पोक्सो कायदा कलम ८ प्रमाणे पाच वर्षाची शिक्षा सुनावण्यात आली. सदर ऐतिहासिक निकाल अमळनेर जिल्हा सत्र न्यायाधीश-२ पी.आर.चौधरी यांनी गुरुवार दि.०८ डिसेंबर रोजी दिला. सदर खटल्यात सरकारी अभियोक्ता अॕड. किशोर बागुल यांनी तर पैरवी अंमलदार म्हणून पोकॉ.नितीन कापडणे यांनी काम पाहिले.
