लोकप्रवाह, चोपडा दि. १६ डिसें. (संदिप ओली) – शहरातील गोरगांवले रोडवरील हॉटेल नाना जवळ फिर्यादी कुणाल प्रदिप पाटील रा. पाटीलगढी हा महसुल व पोलीस विभागाला रेती चोरीच्या टिप देतो या कारणावरुन फिर्यादीस जीवे मारण्याच्या उद्देशाने लोखंडी रॉड, लाकडी काठी तसेच चापटाबुक्क्यांनी मारहाण केली. म्हणून सर्व नऊ जणांवर गुन्हा दाखल करीत त्यांना अटक करण्यात आली. तसेच गुन्ह्यात वापरलेले लोखंडी रॉड, लाकडी काठी, होंडा हॉर्नेट मोटारसायकल, बजाज प्लॅटीना मोटारसायकल जप्त करण्यात आले.
याबाबत सविस्तर वृत्त असे की, दिनांक १५ डिसेंबर रोजी रात्री बारा वाजेच्या सुमारास गोरगावले रोडवरील हॉटेल नाना जवळ आरोपी यांनी गैरकायद्याची मंडळी जमवुन, फिर्यादीस महसुल व पोलीस विभागाला, आमच्या रेती चोरीच्या टिपा का देतो? या कारणावरुन फिर्यादीस तुला खुप माज आला आहे, तुला तुझा जिव प्यारा नाही का, तुला संपवुन टाकतो अशी शिवीगाळ, दमदाटी करुन सर्व 9 आरोपींनी फिर्यादीस चापटाबुक्क्यांनी मारहाण केली. आरोपी नामे दिगंबर रविंद्र सोनवणे याने भगव्या रंगाच्या होंडा हॉर्नेट मोटार सायकलीस लावलेला लोखंडी रॉड काढुन, लोखंडी रॉडने फिर्यादीस जिवे ठार मारण्याच्या उद्देशाने डोक्यावर मारुन दुखापत केली. तसेच आरोपी नामे सागर रविंद्र सोनवणे याने बाजुस उभी असलेल्या प्लॅटीना मोटार सायकलला बांधलेली लाकडी काठी काढून त्याने फिर्यादीच्या पाठीवर मारहाण करुन दुखापत केली म्हणून चोपडा शहर पोलीस स्टेशन येथे सीसीटीएनएस गुन्हा रजि. नं. 518 / 2022 भादंवी कलम 307, 324, 143, 147, 148, 149, 323, 504, 506 नुसार सर्व नऊ जणांवर गुन्हा दाखल करण्यात आला असून त्यांना अटक करण्यात आली आहे.
सदर गुन्ह्यामध्ये दिगंबर रविंद्र सोनवणे व सागर रविंद्र सोनवणे दोघेही रा. भोकर ता. जि जळगाव, ललित मनोहर कोळी व संदिप सज्ज्जन कोळी रा. वडगाव सिम ता. चोपडा, ईश्वर सुरेश सपकाळे, विनय जितेंद्र सरदार, तुषार दिनकर सपकाळे, सचिन सुधाकर देवराज, चेतन राजेंद्र बाविस्कर सर्व रा. गोरगावले ता. चोपडा हे आरोपी असून सर्वांना अटक करण्यात आली असून सदर गुन्ह्याचा पुढील तपास सहाय्यक पोलीस अधिक्षक कृषिकेश रावले व प्रभारी सपोनि. संतोष चव्हाण यांच्या मार्गदर्शनाखाली पोलीस उपनिरिक्षक घनश्याम तांबे करीत आहेत.
