लोकप्रवाह, जळगाव दि. १८ डिसेंबर – संपूर्ण राज्यभर चर्चेत राहिलेल्या जळगाव जिल्हा दूध संघाच्या निवडणूकीनंतर चेअरमन पदी कुणाची वर्णी लागते याकडे सर्वांचे लक्ष लागून होते. चेअरमन पदासाठी अनेक नावं चर्चेत असतांना चेअरमन निवडीच्या पार्श्वभूमीवर संचालक मंडळाची बैठक शनिवार दिनांक १७ डिसेंबर रोजी आयोजित करण्यात आली होती. या नूतन संचालक मंडळाच्या बैठकीत ग्रामविकास मंत्री गिरीष महाजन यांचे निकटवर्तीय चाळीसगावचे भाजप आमदार मंगेश चव्हाण यांच्या नावावर शिक्कामोर्तब झाले आहे. मात्र या संदर्भात अधिकृत घोषणा आज रविवार १८ रोजी होणार आहे.
शनिवारी रात्री उशिरा ११ वाजेपर्यंत नूतन संचालकांची बैठक झाली. या बैठकीला ग्रामविकास मंत्री गिरीश महाजन व पालकमंत्री गुलाबराव पाटील यांच्यासह इतर संचालक उपस्थित होते. जिल्हा दूध संघाच्या निवडणुकीत आमदार मंगेश चव्हाण यांची मोठी भूमिका आहे. माजी मंत्री व राष्ट्रवादीचे नेते एकनाथ खडसेंच्या विरुद्ध बंड पुकारून निवडणुकीत रंगत आणली, तर मुक्ताईनगर मतदारसंघातून मंदाकिनी खडसे यांना त्यांच्याच मतदार संघातून आव्हान देत विजय मिळविला. या विजयामुळे मंगेश चव्हाण राज्याच्या राजकारणात चर्चेत आले. दरम्यान चेअरमनपदी कुणाची वर्णी लागते? याकडे सर्वांचेच लक्ष लागून होते. अखेर आमदार चव्हाण यांच्याच नावावर बैठकीत शिक्कामोर्तब झाले आहे.
