लोकप्रवाह, चोपडा दि. २१ जाने. (संदिप ओली) : शहरातील पंकज महाविद्यालयातील विद्यार्थिनींना रोटरी क्लब ऑफ चोपडा तर्फे सॅनेटरी पॅड मशीनचे वाटप करण्यात आले. सदर मशीनमध्ये ५ रुपयांचे नाणे टाकल्यावर तात्काळ सॅनेटरी पॅड उपलब्ध होणार आहे. रोटरी क्लब आॕफ चोपडाचे अध्यक्ष ॲड. रुपेश पाटील यांनी आपल्या प्रास्ताविकात म्हटले की, मासिक पाळीसंदर्भात समाजमनामध्ये अनेक समज व गैरसमज आहेत ते घालवणे काळाची गरज असून विद्यार्थिनींमध्ये मासिक पाळीसंदर्भात सकारात्मक विचारांची पेरणी करणे गरजेचे असल्याचे त्यांनी यावेळी सांगितले. महाविद्यालयीन विद्यार्थीनींना तात्काळ सॅनेटरी पॅड उपलब्ध व्हावेत हि भूमिका डोळ्यासमोर ठेवून प्रकल्प प्रमुख संध्या महाजन यांनी सदर मशीन उपलब्ध करून द्यावे अशी भूमिका मांडली असल्याचे ते यावेळी म्हणाले.
सदर सॅनेटरी पॅड मशीन पंकज महाविद्यालयाच्या प्रा. डॉ. नंदिनी वाघ यांच्या ताब्यात देण्यात आले. याप्रसंगी पंकज शैक्षणिक व सामाजिक संस्थेचे अध्यक्ष डॉ. सुरेश बोरोले, प्राचार्य आर.आर. अत्तरदे, दिपाली बोरोले आदिंची प्रमुख उपस्थिती होती. यावेळी रोटरी अध्यक्ष ॲड. रुपेश पाटील, सचिव गौरव महाले, प्रकल्प प्रमुख संध्या महाजन, पंकज बोरोले, चेतन टाटिया, सुरेखा मिस्त्री, विजय पाटील, पृथ्वीराज राजपूत, स्वप्नील महाजन आदी रोटेरियन उपस्थित होते.
