लोकप्रवाह, चोपडा दि. २४ जाने. (संदिप ओली) : तालुक्यातील अनेक गावांमध्ये घरकुल योजना मंजूर झालेली आहेत परंतु स्वतःच्या मालकीची जागा नसल्यामुळे किंवा गायरान तसेच शासकीय जागा गावातील सरपंच व ग्रामसेवक मिळू देत नसल्यामुळे मागासवर्गीय व आदिवासींना घरकुल बांधता येत नाही. यासाठी पुरोगामी संघर्ष परिषदेचे उत्तर महाराष्ट्र अध्यक्ष धर्मा भिल (सोनवणे) यांच्या नेतृत्वात शिष्टमंडळाने चोपडा पंचायत समितीच्या गटविकास अधिकारी यांची भेट घेऊन सदर मागण्या १० दिवसांच्या आत मंजूर न झाल्यास पंचायत समिती कार्यालयात आमरण उपोषण करण्याचा इशारा निवेदनाद्वारे दिला आहे.
सदर निवेदनामध्ये कठोरे गावातील ज्या लोकांची घरकुल योजनेतून घरे मंजूर झालेली आहेत, त्यांना जिल्हा परिषद शाळेजवळील गट नंबर 2 च्या जागेत मंजूर घरकुल बांधण्यास परवानगी देण्यात यावी. तसेच आदिवासी समाजाला विश्वासात न घेता गट नंबर ३ मधील झालेला ठराव रद्द करण्यात यावा.,
घरकुल मंजूर झालेल्या लाभार्थ्यांकडून दहा हजार रुपयांची मागणी का केली जाते? याबाबत खुलासा करावा., गट नंबर ३ मधील जागेत मोठ मोठे खड्डे व लवणे असून तिथे घरकुल बांधकाम करणे योग्य नाही त्यामुळे ते रद्द करण्यात यावे., घरकुल योजनेतील मंजूर झालेल्या ८ लोकांची प्रकरणे का रद्द केली? याचा खुलासा तसेच रद्द झालेली आठ प्रकरणे ताबडतोब मंजूर करण्यात यावीत., त्याबरोबरच गट नंबर २ मधील जिल्हा परिषद शाळेजवळील जागेला विरोध करणाऱ्या सरपंच, ग्रामसेवक व इतर सर्वांवर ॲट्रॉसिटी कायद्या अंतर्गत गुन्हा दाखल करावा आदि मागण्यांचा समावेश आहे.
यावेळी चोपडा तालुका अध्यक्ष खुशाल भिल, इलाल भिल, दंगल भिल, भोमा भिल, रविंद्र भिल, विश्वास भिल, कालू भिल, आण्णा भिल आदिंसह पुरोगामी संघर्ष परिषदेचे इतर पदाधिकारी व कार्यकर्ते उपस्थित होते.
