लोकप्रवाह, चोपडा दि. २६ जाने. (संदिप ओली) – येथील चोपडा एज्युकेशन सोसायटी संचलित, प्रताप विद्या मंदिर येथे इयत्ता तिसरीत शिकणारी विद्यार्थीनी अविका कमलेश गायकवाड ही “रंगोत्सव” सेलिब्रेशन नॅशनल अँड इंटरनॅशनल ड्रॉइंग कॉम्पिटिशन, मुंबई यांच्यातर्फे आयोजीत राष्ट्रस्तरीय चित्ररंगभरण स्पर्धेत संपूर्ण देशातून सर्वप्रथम आली. या स्पर्धेत सर्व राज्यातील विद्यार्थ्यांनी भाग घेतला होता. अवघ्या नऊ वर्षाची अविकाने भारतातून प्रथम क्रमांक मिळविला. व आता तिची निवड आंतरराष्ट्रीय चित्ररंगभरण स्पर्धेत करण्यात आली आहे.
यापूर्वीही अविकाने बालवर्गात असताना चित्रकला स्पर्धेत राष्ट्रीय स्तरावर दोन सुवर्णपदक व सन्मानपत्र मिळविले आहेत. आता ऑइल पेस्टल कलर आपल्या छोट्या छोट्या बोटांच्या सहाय्याने कागदावर रंग एकत्र करून चित्रात स्वप्नमय आभास निर्माण करण्याचे तंत्र शोधून ऑइल पेस्टल व रंगीत पेन्सिली अशा दोन्ही माध्यमात ती रंगकाम करते. अविकाला चित्रकलेचे बाळकडू घरातूनच मिळाले. अविका ही सेवानिवृत्त कलाशिक्षक ए. ए. गायकवाड यांची नात असून प्रताप विद्या मंदिर येथील कलाशिक्षक कमलेश गायकवाड यांची मुलगी आहे. दोन पिढ्यांपासून कलेची सेवा करणाऱ्या गायकवाड परिवारात आता ही तिसरी पिढीही कलाक्षेत्रात आपली चुणूक दाखवत आहे. विशेष बाब म्हणजे या स्पर्धेत अविकाचे दोन्ही लहान बंधू बालकलाकार चि. अविष्कार व चि.अंशू यांनाही सुवर्णपदक, सन्मानपत्र व आकर्षक रेस कार बक्षीस स्वरूपात मिळाले आहेत. असा हा कलेचा वारसा पुढे चालवणाऱ्या गायकवाड परिवारातील कलाकार सदस्यांना यापूर्वीही कलाक्षेत्रात अनेक पारितोषिके मिळाली आहेत.
देशातून प्रथम म्हणून मिळालेल्या पारितोषिकाचे स्वरुप आकर्षक स्मृतीचिन्ह, सन्मानपत्र, किड्स स्टेट स्कुटी असे होते. प्राध्यापक जेष्ठ साहित्यिक इंद्रजीत भालेराव, माजी विधानसभाध्यक्ष अरुणभाई गुजराथी, चोपडा एज्युकेशन सोसायटीच्या अध्यक्षा शैलाबेन मयूर, उपाध्यक्ष विश्वनाथ अग्रवाल, चेअरमन राजाभाई मयूर, सचिव माधुरी मयूर , चंद्रहासभाई गुजराथी, भूपेंद्रभाई गुजराथी, रमेश जैन, प्रवीण सप्तर्षी, डॉ. विकास हरताळकर, प्रवीणभाई गुजराथी, जीवन चौधरी आदी मान्यवरांच्या हस्ते अविकाला आकर्षक स्मृतीचिन्ह, स्किड स्केट स्कुटी, गौरवपत्र देऊन सन्मानित करण्यात आले. अविकाच्या या लहान वयातील मोठ्या यशाबद्दल संस्था समन्वयक गोविंद गुजराथी, डी. टी. महाजन, उल्हास गुजराथी, मुख्याध्यापक पी. एस. गुजराथी, सुनील पाटील, उपमुख्याध्यापक एस. जी. डोंगरे, पर्यवेक्षक पी. डी. पाटील, एस. एस. पाटील, माधुरी पाटील, कलाशिक्षक पंकज नागपुरे तसेच शाळेतील सर्वच शिक्षकांनी अविकाचे कौतुक केले. अविकाच्या या यशाबद्दल सर्वच स्तरातून कौतुक आणि आनंद व्यक्त केला जात आहे.
