लोकप्रवाह, भुसावळ दि. २७ जाने. – शहरासह सावदा परीसराला शुक्रवारी सकाळी 10.35 वाजेच्या सुमारास भूकंपाचे हादरे बसल्याने नागरीकांमध्ये मोठी खळबळ उडाली आहे. भूकंपाची तीव्रता 3.3 रिश्टर स्केल इतकी असल्याची माहिती सूत्रांनी दिली.
भुसावळसह सावदा परीसरात जाणवले धक्के
भुसावळ शहर व परिसरात शुक्रवारी सकाळी दहा वाजून 35 मिनिटांनी भूकंपाचे धक्के जाणवले. अनेक ठिकाणी इमारती हलल्या तर काही ठिकाणी घरातील भांडेदेखील पडल्याचे सांगण्यात आले तर काही वेळ या प्रकाराने गोंधळाचे वातावरण निर्माण झाले होते. भुसावळसह लगतच्या कंडारी रायपुर भागातही दहा ते तीस सेकंद भूकंपाचे धक्के जाणवले. या भूकंपात कोणतीही जीवित किंवा वित्तहानी झाल्याची माहिती समोर आलेली नाही.
नागरीक पटापट पडले इमारतीबाहेर
भुसावळ शहरातील काही नागरीकांना साडेदहाच्या सुमारास घरांना हादरे बसल्याची, तसेच काहीतरी मोठ्याने पडल्यावर जसा आवाज येतो, तसा आवाज आल्याचे सांगितले. काही इमारतींमधून नागरीक त्वरेने बाहेर पडले. नागरीकांनी घाबरू नये तसेच अफवांवर विश्वास ठेवू नये, असे आवाहन प्रशासनाच्या वतीने करण्यात आले आहे.
