लोकप्रवाह, चोपडा दि. २१ फेब्रु. (संदिप ओली) : येथील प्रताप विद्या मंदिरातील 19 वर्ष वयोगटातील खेळाडू गणेश दिपक महाजन याने नुकत्याच पार पडलेल्या शालेय शासकीय राज्यस्तरीय वेटलिफ्टिंग स्पर्धेत उत्तम कामगिरी करत कास्यपदक पटकाविले. गणेश हा बोल बजरंग बहुद्देशीय संस्थेचे अध्यक्ष, सामाजिक कार्यकर्ते व बांधकाम क्षेत्रातील प्रसिद्ध जय बजरंग लॕंड डेव्हलपर्सचे संचालक दिपक श्रावण महाजन यांचा चिरंजीव आहे.
क्रिडा व युवक सेवा संचालनालय महाराष्ट्र राज्य, पूणे अंतर्गत जिल्हा क्रिडा परिषद व जिल्हा क्रिडा अधिकारी कार्यालय, सांगली द्वारा आयोजीत दि. २९ जानेवारी ते ३१ जानेवारी या दरम्यान सांगली येथे पार पडलेल्या राज्यस्तरीय वेटलिफ्टिंग क्रिडा स्पर्धेत चोपडा येथील प्रताप विद्या मंदिरातील इयत्ता ११ वी चा विद्यार्थी गणेश महाजन याने 102 किलो वजनी गटात 170 किलो वजन उचलून तृतीय क्रमांक मिळवित कास्यपदक पटकाविले. अशी कामगिरी करणारा तो चोपडा तालुक्यातील एकमेव खेळाडू आहे. त्याच्या या उत्कृष्ट कामगिरीमुळे त्याचा प्रताप विद्या मंदिर येथील अध्यक्ष व संचालक मंडळाने तसेच मुख्याध्यापक, सर्व शिक्षक व शिक्षकेतर कर्मचारी वर्गाने सत्कार केला. त्याचप्रमाणे सामाजिक, शैक्षणिक, राजकीय अशा विविध स्तरातून त्याच्यावर अभिनंदनाचा वर्षाव होत आहे.
आई – वडीलांनी दिलेली प्रेरणा व गुरुंचे मार्गदर्शन याच्या जोरावर मी इथपर्यंत पोहचु शकलो आहे. यापुढे प्रत्येक राज्यस्तरीय व राष्ट्रीय स्पर्धेत प्रथम क्रमांक मिळवित सुवर्णपदक पटकावणार असा दृढ निश्चय गणेश महाजन यानी लोकप्रवाहशी बोलतांना व्यक्त केला. गणेश महाजन याला प्रताप विद्या मंदीर चे क्रिडा शिक्षक आप्पा पाटील व एन.एन.महाजन यांनी मार्गदर्शन केले.
