लोकप्रवाह, चोपडा दि. २८ फेब्रु. (संदिप ओली) : येथील महात्मा गांधी शिक्षण मंडळ संचलित ऑक्सफर्ड इंग्लिश मीडियम स्कूलमध्ये राष्ट्रीय विज्ञान दिनाचे औचित्य साधून विज्ञान प्रदर्शन आयोजित करण्यात आले होते. कार्यक्रमाची सुरुवात मान्यवरांच्या हस्ते दीप प्रज्वलन करून करण्यात आली. नोबेल पुरस्कार प्राप्त, भारतरत्न डॉ. सी.वी. रमण यांच्या प्रतिमेचे यावेळी पूजन करण्यात आले. याप्रसंगी संस्थेचे अध्यक्ष अॕड. संदीप सुरेश पाटील, डॉ. सचिन काटे, डाॕ. वैभव पाटील, एन. एस. सोनवणे, डी. एस. पाटील, अशोक साळुंखे, विज्ञान प्रदर्शन स्पर्धा परीक्षक डॉ. लालचंद पटले, प्रीती रावतोळे, टी. एस. पिंजारी, संगीता पाटील, हरेश चौधरी, जितेंद्र पाटील, अतुल पाटील, कुणाल गायकवाड, डॉ. शैलेश वाघ, डी. पी. सोनवणे, शाळा समन्वयक अमन पटेल, अश्विनी पाटील, सुचिता पाटील व दिपाली पाटील आदि मान्यवरांची उपस्थिती होती.
याप्रसंगी विद्यार्थ्यांना कुणाल गायकवाड, प्रीती रावतोळे व अतुल पाटील यांनी मार्गदर्शन केले. विज्ञान प्रदर्शनामध्ये इयत्ता १ली ते ८ वीचे विद्यार्थी सहभागी झाले होते. खगोलशास्त्र, भूगर्भशास्त्र, वनस्पतीशास्त्र, रसायनशास्त्र व भौतिकशास्त्र यांवर आधारित प्रतिकृती विद्यार्थ्यांनी सादर केल्या. उपयोजित विज्ञानावर आधारित विविध प्रतिकृतींचा समावेश देखील या विज्ञान प्रदर्शनात होता. विविध आकर्षक व माहितीपूर्ण विज्ञान प्रकल्पांच्या माध्यमातून दैनंदिन समस्यांवरील उपाय विद्यार्थ्यांनी सुचविले. तसेच इयत्ता १ली आणि २ री च्या विद्यार्थ्यांसाठी अनोख्या फॅन्सी ड्रेस स्पर्धेचे आयोजन करण्यात आले होते. यात मुलांनी सूर्यमाला, प्रकाश तसेच वेगवेगळ्या प्रकारचे कीटक, पशु, पक्षी, झाडे, वेली, फुले व फळे यांचे प्रतिनिधित्व करणारा पोशाख परिधान केला होता.
राष्ट्रीय विज्ञान दिनानिमित्त कलाशिक्षक शकील अहमद यांनी उत्कृष्ट असे आकर्षक फलक रेखाटन केले. विज्ञान प्रदर्शनासाठी विद्यार्थ्यांना विज्ञान शिक्षक कल्पना बारी, साक्षी बिडकर, हेमांगी पाटील, अर्चना जैन, धनश्री पवार, पूजा अग्रवाल यांचे मार्गदर्शन लाभले. सदर कार्यक्रमाचे सूत्रसंचालन विज्ञान शिक्षिका साक्षी बिडकर आणि पूजा अग्रवाल यांनी केले तर आभारप्रदर्शन शिक्षिका अर्चना जैन यांनी केले. कार्यक्रम यशस्वीतेसाठी मुख्याध्यापिका ममता कपिल न्याती यांचे मार्गदर्शनाखाली सर्व शिक्षक व शिक्षकेतर कर्मचाऱ्यांनी परिश्रम घेतले.
