टिम लोकप्रवाह, चोपडा दि. २६ एप्रिल – येथील नागरी प्राथमिक आरोग्य केंद्रात तालुका आरोग्य अधिकारी डॉ. प्रदिप लासुरकर व वैद्यकीय अधिकारी डॉ. चंद्रकांत बारेला यांच्या मार्गदर्शनाखाली २५ एप्रिल २०२३ रोजी जागतिक हिवताप दिन साजरा करण्यात आला. यावेळी तालुक्यातील इतर आरोग्य केंद्र व उपकेंद्रातही जागतिक हिवताप दिन साजरा करण्यात आला.
संपूर्ण तालुक्यात दिनांक 1 एप्रिल ते 30 एप्रिल दरम्यान हिवताप जनजागृती महिना साजरा करण्यात येवून हिवतापाविषयी सर्वसामान्य नागरिकांमध्ये जनजागृती निर्माण व्हावी. व त्यावर प्रतिबंधात्मक उपाय योजनेची अंमलबजावणी होवून त्यामध्ये सक्रिय सहभाग प्राप्त करून घेण्याच्या दृष्टीने प्रत्येक वर्षी विविध उपक्रमाद्वारे जनतेपर्यंत माहिती पोहोचविण्याचा प्रयत्न करणे हा या मोहिमेचा प्रमुख उद्देश असतो. सदर मोहिम जिल्हा आरोग्य अधिकारी डॉ. देवराम किसन लांडे, तालुका आरोग्य अधिकारी डॉ. प्रदीप लासुरकर व तालुका आरोग्य पर्यवेक्षक जगदीश बाविस्कर यांच्या मार्गदर्शनाखाली संपूर्ण तालुक्यात जागतिक हिवताप दिनानिमित्त राबविण्यात येणार आहे, असे यावेळी सांगण्यात आले.
यावेळी आठवड्यातील एक दिवस कोरडा दिवस पाळा, पाणीसाठे झाकून ठेवा, डबकी, विहिरी, तळी झाकून ठेवा, डासविरोधी अगरबत्ती, मच्छरदाणी वापरा, कोणताही ताप आल्यास त्वरित रक्त तपासणी करा अशा सूचना देऊन हिवताप विषयी जनजागृती यावेळी करण्यात आली. तसेच यावेळी हिवतापाची लक्षणे व प्रतिबंधात्मक उपाय याबाबत माहिती असलेली हस्तपत्रिका वाटप करण्यात आली. साचलेल्या पाण्यात गप्पी मासे सोडणे, लहान डबकी बुजवणे, वॉल गळती काढणे व बस स्टॅन्ड परीसरात माहिती देणे इत्यादी प्रतिबंधात्मक उपाययोजनेसंबंधी कार्यक्रम घेण्यात येणार असल्याची माहिती यावेळी देण्यात आली. याप्रसंगी सर्व आरोग्य सेविका व आशा स्वयंसेविका यांच्यासह नागरिकांची उपस्थिती होती.
