टिम लोकप्रवाह, जळगांव दि.२७ एप्रिल – येथील लाचलुचपत प्रतिबंधक विभागात कार्यरत पोहेकॉ. रविंद्र धोंडू घुगे यांना नुकताच पोलीस महासंचालक पदक जाहीर झाले. त्याबद्दल त्यांचा लाचलुचपत प्रतिबंधक विभाग, जळगाव विभागातर्फे पोलीस उपअधिक्षक शशिकांत एस. पाटील यांच्या हस्ते सत्कार करण्यात आला.
जळगांव लाचलुचपत प्रतिबंधक विभाग येथे कार्यरत असलेले रविंद्र घुगे यांची पोलीस दलातील कामगिरी उत्कृष्ट व गौरवपुर्ण असून त्यांना आजपर्यंत झालेल्या एकुण सेवा कालावधीमध्ये १९५ बक्षिसे, ०९ प्रशंसा पत्रके व १० अतिउत्कृष्ट अभिप्राय मिळालेले आहेत. त्यांच्या या कामगिरीचा यथोचित सन्मान म्हणून त्यांना नुकताच पोलीस महासंचालक यांचे सन्मान चिन्ह जाहीर झाल्याने त्यांना लाचलुचपत प्रतिबंधक विभाग नाशिक परिक्षेत्र पोलीस अधीक्षक श्रीमती. शर्मिष्ठा घारगे – वालावलकर, अप्पर पोलीस अधीक्षक एन. एस. न्याहळदे, वाचक पोलीस उपअधीक्षक नरेंद्र पवार आदिंनी अभिनंदन करून शुभेच्छा दिल्यात. तसेच रविंद्र धोंडू घुगे यांचा लाचलुचपत प्रतिबंधक विभाग, जळगाव येथील कार्यालयात पोलीस उपअधीक्षक शशिकांत एस.पाटील यांनी सत्कार केला. यावेळी पोलीस निरीक्षक संजोग बच्छाव व लाचलुचपत प्रतिबंधक विभाग, जळगाव येथील सर्व पोलीस अंमलदार उपस्थित होते.
