टिम लोकप्रवाह, चोपडा दि. ०४ जुलै – सर्वसामान्य व आदिवासी ग्रामीण जनतेला कारवाईच्या नावाखाली नाहक त्रास देणाऱ्या चोपडा ग्रामीण पोलीस स्टेशनच्या कर्मचाऱ्यास बदली झाल्यावरही मुक्त न केल्यामुळे डॉ. चंद्रकांत बारेला व मित्रपरिवार यांनी त्या पोलीस कर्मचाऱ्यास ग्रामीण पोलीस स्टेशनमधून मुक्त करावे अशा आशयाचे लेखी निवेदन पोलीस निरिक्षक कावेरी कमलाकर व उपविभागीय पोलीस अधिकारी कार्यालयास दिले. तसे न केल्यास तीव्र आंदोलन छेडण्यात येईल असेही यावेळी सांगितले.
याबाबत सविस्तर वृत्त असे की, चोपडा ग्रामीण पोलीस स्टेशन येथे कार्यरत असलेले पोलीस हवालदार लक्ष्मण त्र्यंबक शिंगाणे हे सातपुड्यातील भागात बीट अमंलदार म्हणून कार्यरत होते. लक्ष्मण शिंगाणे हे ग्रामीण भागातील आदिवासी बांधवांना विनाकारण त्रास देत असून त्यांच्याकडून पैसे उकळत असतात. तसेच नुकतीच त्यांची बदली होवून सुद्धा त्यांना पोलीस स्टेशन येथून मुक्त केले नसल्याने आश्चर्य व्यक्त होत असल्याचे डॉ. बारेला यांनी म्हटले आहे. अशा ग्रामीणा व आदिवासी ग्रामस्थांन नाहक त्रास देणाऱ्या हवालदारास पोलीस स्थानकातून लवकरात लवकर मुक्त न केल्यास तीव्र स्वरूपाचे आंदोलन छेडण्याचा इशारा डॉ. चंद्रकांत बारेला व मित्र परिवाराच्या वतीने देण्यात आला.
सदर निवेदनावर अमोल राजपूत, सचिन पाटील, निलेश जाधव, विकास निकम, ज्ञानेश्वर भिल, अनिल बाविस्कर, भूषण भिल आदींच्या स्वाक्षऱ्या आहेत.
