टिम लोकप्रवाह, चोपडा दि. २९ जुलै : रुग्णाचे प्राण वाचविण्यासाठी डॉक्टर्स शर्थीचे प्रयत्न करतात, अशी अनेक उदाहरणे आहेत. परंतु ज्यांना डॉक्टरांचे नावही योग्यपणे उच्चारता येत नाही, अशा आदिवासी रुग्ण महिलेचे प्राण वाचविण्यासाठी खुद्द एका डॉक्टरांनीच रक्तदान केले, असा प्रसंग अभावानेच दिसून येतो. परंतु मानवतेला अधिक उंचीवर नेणारा हा प्रसंग सातपुड्यासारख्या देवगड या आदिवासी दुर्गम भागात घडून आला आहे.
चोपडा तालुक्यातील वैजापूर प्राथमिक आरोग्य केंद्रांतर्गत देवझिरी येथे उपकेंद्र आहे. या उपकेंद्रात चार महिन्याची गरोदर असलेली एक २४ वर्षीय महिला आली. रक्तक्षय झाल्याने अगदी अशक्त अवस्थेत तिला डॉक्टरांनी दाखल करुन घेतले. तपासणीअंती त्या महिलेचे हिमोग्लोबीन केवळ ४.८ टक्क्यांवर असल्याचे निष्पन्न झाले. साधारणत: ते १०-११ टक्केचे वर असावे लागते. त्यामुळे तिला बी पॉझिटिव्ह रक्ताची नितांत गरज होती. परंतु तिच्याकडे कोणीही रक्तदाता नाही, असे कुटुंबीयांतर्फे सांगण्यात आले. शेजारी किंवा हितसंबंधातील आणखी कुणी रक्त देऊ शकेल, असेही कुणीच नसल्याचे कुटुंबीयांचे म्हणणे होते.
सर्व प्रकार तिच्यावर उपचार करणारे तेथील समुदाय आरोग्य अधिकारी (सीएचओ) डॉ. आनंद मोतीराम राठोड यांच्या लक्षात आला. त्यानंतर त्यांनी स्वत: रक्त देण्याचा निर्णय घेतला. क्षणभर त्यांच्या या निर्णयावर गरोदर महिलेच्या कुटुंबीयांचा विश्वासच बसला नाही. परंतु दुसऱ्याच दिवशी सकाळी डॉक्टर स्वत: देवझिरी येथून ३५ ते ४० किलोमीटर दूर चोपडा गेले. तेथे रक्तदान केल्यानंतर रक्ताच्या वेगवेगळ्या तपासण्या केल्या गेल्या आणि त्यानंतर दुपारी ४ वाजेपर्यंत परत येऊन त्या महिलेला रक्त चढवले गेले. रक्त शरीरात पोहचल्यानंतर महिलेच्या हिमोग्लोबीनमध्ये पुरेशी वाढ झाली तसेच गर्भातील बाळालाही योग्य पोषण प्राप्त झाले. दरम्यान ही महिला अशक्तपणापासून सावरली आहे.
डॉ. आनंद राठोड यांनी प्रसंगावधान राखून दिलेल्या अद्वितीय आरोग्यसेवेने आदिवासी बांधवांकडून तसेच वरिष्ठ आरोग्य अधिकाऱ्यांकडून त्यांचेवर कौतुकाचा वर्षाव होत आहे.
