टिम लोकप्रवाह, चोपडा दि. ३१ जुलै – येथील विवेकानंद विद्यालयात 30 जुलै 2023 रोजी सुप्रसिद्ध गायक पंडित जितेंद्र अभिषेकी यांचे शिष्य पंडित डॉ. राजा काळे, मुंबई यांचे गायन या विषयावर एक दिवसाचे शिबिर संपन्न झाले. शिबिराची सुरुवात सरस्वती देवीच्या प्रतिमेला पुष्पहार अर्पण करून व दीपप्रज्वलन करून करण्यात आली. पंडित डॉक्टर राजा काळे व त्यांच्या सोबत हार्मोनियम वादनासाठी वसई येथून आलेले श्याम जोशी या दोघांचा यथोचित सन्मान करण्यात आला. तबल्याची साथ नरेंद्र भावे व श्रेयस भावे यांनी केली.
संगीत विषय मानवी जीवनात किती महत्त्वाचा व अर्थपूर्ण आहे, या संदर्भात साध्या व सोप्या भाषेत माहिती दिली. गायन कलेबद्दल खूप महत्त्वाच्या गोष्टींचे त्यांनी विद्यार्थ्यांना मोलाचे मार्गदर्शन प्रात्यक्षिकासह केले. व याप्रसंगी काही नवीन रचना विद्यार्थ्यांकडून गाऊनही घेतल्या. कलेमुळे माणूस चांगल्या संस्कारांनी कसा घडतो, त्याच्यात चांगली मूल्ये कशी रुजतात, यासाठी उत्तम दाखले दिले. विद्यालयातील व चोपडा शहरातील संगीत विषयाचे क्लास करणाऱ्या विद्यार्थ्यांनी शिबिर यशस्वीरित्या पूर्ण केले. त्याबद्दल त्यांना प्रशस्तीपत्रही देण्यात आले.
यावेळी संस्थेचे संस्थापक अध्यक्ष डॉ. विकास हरताळकर, सचिव अॕड. रवींद्र जैन, सहसचिव डॉ. विनीत हरताळकर, विलास पाटील, विश्वस्त व मुख्याध्यापक नरेंद्र भावे, प्राथमिक विभागाच्या मुख्याध्यापिका आशा चित्ते यांच्यासह सर्व विभागाचे शिक्षकवृंद, संगीत शिक्षक, संगीत प्रेमी पालक वर्ग व श्रोते उपस्थित होते. शिबिराचे फलक लेखन व शिबिरार्थी विद्यार्थ्यांची पूर्वतयारी कलाशिक्षक राकेश विसपुते यांनी केली, तर कार्यक्रमाचे सूत्रसंचलन उपशिक्षिका माधुरी हळपे व आभारप्रदर्शन मुख्याध्यापक नरेंद्र भावे यांनी केले. शिबिर संपन्नतेसाठी पवन लाठी यांच्यासह सर्व शिक्षकवृंद व कर्मचारीवृंद यांनी परिश्रम घेतले.
