लोकप्रवाह, चोपडा दि. ३ आॕगस्ट – तालुक्यातील घोडगाव येथील नूतन शिक्षण प्रसारक मंडळ संचलित सी. बी. निकुंभ माध्यमिक व उच्च माध्यमिक विद्यालयात महसूल व वन विभाग अंतर्गत १ ऑगस्ट ते ७ ऑगस्टपर्यंत आयोजीत युवा संवाद कार्यक्रमाचा प्रारंभ झाला. याप्रसंगी प्रांताधिकारी एकनाथ बंगाळे, तहसीलदार भाऊसाहेब थोरात, नायब तहसीलदार सचिन बांबळे, आर. बी. माळी, संस्थेचे सचिव जवरीलाल जैन, भानुदास पाटील, रमेश पाटील आदिंची उपस्थिती होती. याप्रसंगी उपस्थित मान्यवर, तलाठी व ग्रामसेवक यांचा सत्कार करण्यात आला.
या सप्ताहअंतर्गत इ. ९वी ते १२वीतील विद्यार्थ्यांना विविध प्रमाणपत्रांची माहिती देण्यात आली. त्यामध्ये ई-पीक पाहणी अॕप, नवीन मतदार नोंदणी अर्ज स्वीकारणे अशा विविध शासकीय योजनांचा समावेश होता. याप्रसंगी जातीचे प्रमाणपत्र, डोमिसाईल प्रमाणपत्र व उत्पन्नाचा दाखला इत्यादी प्रमाणपत्रांचे वाटप करण्यात आले. परिसरातील कृषीमित्रांचा देखील यावेळी सत्कार करण्यात आला. विद्यार्थ्यांनी शासनाच्या विविध योजना व विविध प्रमाणपत्रासाठी लागणारी कागदपत्रे, त्याचा प्रसार प्रचार आपल्या घरी तसेच परिसरात करावा असे प्रांताधिकारी बंगाळे यांनी आवाहन केले. कार्यक्रमाचे सूत्रसंचालन एस. पी. बिऱ्हाडे यांनी तर आभारप्रदर्शन हातेड मंडळचे तलाठी आशिष निचित यांनी केले. सदर कार्यक्रम यशस्वीतेसाठी मुख्याध्यापक आर. पी. चौधरी, सर्व शिक्षक व शिक्षकेतर कर्मचारी आदींनी परिश्रम घेतले.
