टिम लोकप्रवाह, वर्धा, दि.11 : आगामी लोकसभा सार्वत्रिक निवडणुकीच्या अनुषंगाने मतदारांमध्ये ईव्हीएम व व्हीव्हीपॅट मशिन्सच्या पारदर्शकतेबाबत, निवडणूक व मतदान प्रक्रिया संबंधाने दृकश्राव्याच्या माध्यमातून नागरिकांमध्ये जनजागृती व्हावी यासाठी विशेषत्वाने तयार करण्यात आलेल्या मोबाईल डेमो व्हॅनचा जिल्हाधिकारी तथा जिल्हा निवडणूक अधिकारी राहूल कर्डिले यांचा हस्ते शुभारंभ करण्यात आला.
यावेळी जिल्हाधिकाऱ्यांनी एमडीव्ही व्हॅनला हिरवी झेंडी दाखवून रवाना केले. निवडणूक उपजिल्हा अधिकारी अनिल गावीत, देवळी विधानसभा मतदारसंघ नोंदणी अधिकारी प्रियांका पवार, वर्धा विधानसभा मतदारसंघ नोंदणी अधिकारी दिपक कारंडे, सहाय्यक मतदार नोंदणी अधिकारी तथा वर्धा तहसीलदार रमेश कोळपे, नायब तहसीलदार निवडणूक अतुल रासपायले यांची प्रामुख्याने यावेळी उपस्थिती होती.
मतदारांमध्ये ईव्हीएम व व्हीव्हीपॅट मशिन्सच्या पारदर्शकतेबाबत जनजागृती करण्यासाठी अभियान सुरू करण्यात आले आहे. जिल्ह्यातील चारही विधानसभाकरिता एकूण आठ एमडीव्ही व्हॅन मतदारांच्या सेवेत सज्ज झाल्या असून त्यावर एलईडीद्वारे दृकश्राव्याच्या माध्यमातून निवडणूक व मतदानसंबंधाने जनजागृती करण्यात येणार आहे. यामध्ये ईव्हीएम व व्हीव्हीपॅट मशिन्स उपलब्ध राहणार आहे. तज्ञांद्वारे मतदारांचे प्रश्नांचे समाधान करण्यात येणार असून ईव्हीएमबाबत संपूर्ण माहिती देणार आहे.
ईव्हीएम व व्हीव्हीपॅटबाबत मतदारांमध्ये विश्वास निर्माण व्हावा यासाठी जिल्ह्यातील देवळी, आर्वी, वर्धा व हिंगणघाट या चारही विधानसभा मुख्यालयाच्या ठिकाणी ईव्हीएम डेमो सेंटर सुरू करण्यात आले आहे. आतापर्यंत एकूण 6 हजार 10 मतदारांनी प्रत्यक्ष ईव्हीएम मशिन्स हाताळणी करुन या अभियानात भाग घेतला आहे.
गावोगावी येणाऱ्या ईव्हीएम व व्हीव्हीपॅट मशिन नागरिकांनी विशेषत: नवयुवकांनी प्रत्यक्ष मतदान करुन मतदान करण्याची पध्दती समजून घ्यावी व आगामी निवडणुकीत मोठ्या प्रमाणात व उत्साहात मतदान करावे, असे आवाहन जिल्हाधिकारी तथा जिल्हा निवडणूक अधिकारी राहुल कर्डिले यांनी केले आहे.
