लोकप्रवाह, चोपडा दि. २५ जून – तालुक्यातील आदिवासी भागातील सत्रासेन गावातील आश्रमशाळेत गांधी रिसर्च फाऊंडेशनच्या वतीने युवा संस्कार व व्यक्तीमत्त्व विकासाविषयी पाच दिवसीय शिबिर चे उद्घाटन झाले. कार्यक्रमाची सुरुवात दिपप्रज्वलनाने करण्यात आली. युवकांच्या कलागुणांना वाव मिळावा तसेच महात्मा गांधींची जिवन शैली आत्मसात करून आजच्या युवकांचा गावाकडे बघण्याचा प्रगल्भ दृष्टीकोन ठेवणारे ग्रामीण कार्यकर्ते तयार करणे व गांधी विचारांचा प्रसार करून लोकांना स्वावलंबी बनविण्यासाठी या शिबीरामध्ये प्रबोधन करण्यात आले. या शिबिरात गौरयापाडा, वैजापूर व खार्यापाडा गावातील युवकांनी सहभाग घेतला. या उपक्रमाकरीता संस्थेचे अध्यक्ष रविंद्र भादले, उपाध्यक्ष धनंजय भादले व सचिव प्रा. ज्ञानेश्वर भादले यांनी विशेष सहकार्य केले.
याप्रसंगी प्रमुख अतिथी म्हणून गांधी रिसर्च फौंडेशनचे गिरीश कुलकर्णी, सत्रासेन माध्यमिक व उच्च माध्यमिक आश्रमशाळेच्या प्राचार्य व चोपडा माध्यमिक पतपेढीच्या उपाध्यक्षा वंदना भादले, प्राथमिकचे मुख्याध्यापक जगदिश महाजन, उच्च माध्यमिकचे शिक्षक भालचंद्र पवार आदिंची उपस्थिती होती. यावेळी भुमिका विक्रम असवार व चंद्रकांत चौधरी या विद्यार्थ्यांनी विशेष योगदान दिले. कार्यक्रम यशस्वीतेकरीता सर्व शिक्षक व शिक्षकेत्तर कर्मचारी आदिंनी परिश्रम घेतले.
