टिम लोकप्रवाह, चोपडा दि.२५ :- २१ व्या शतकाकडे वाटचाल करत असले तरी ग्रामीण भागात चालीरीती यांना फार महत्त्व दिले जाते. परंतु या सर्व चालीरीतींना बाजूला सारून अवाजवी पैसा खर्च न करता समाजाचे काही देणे लागतो, या उदात्त भावनेतून तालुक्यातील लासूर येथील योगेश वाघ यांनी त्यांच्या आई व वडीलांच्या स्मृतीपित्यर्थ जिल्हा परिषद मुला व मुलींची शाळा यांना एक इंव्हर्टर संच व एलईडी टिव्ही संच देवून एक वेगळा सामाजिक आदर्श निर्माण केला. त्यांच्या या दातृत्वाबद्दल पंचक्रोशीतून त्यांचे कौतुक केले जात आहे.
तालुक्यातील लासूर येथील श्री नाटेश्वर पिक संरक्षण सोसायटीचे संस्थापक चेअरमन तथा माजी ग्रा. पं. सदस्य स्व. नारायण दामोदर वाघ यांचे नुकतेच अकस्मात निधन झाले. त्यांच्या दशक्रिया विधीवर अवाजवी खर्च न करता त्यांचे चिरंजीव योगेश वाघ यांनी आई व वडील यांच्या स्मृतीपित्यर्थ गावातील जिल्हा परिषद शाळेत विद्युत पुरवठा नसल्यास गोरगरिब मुलांच्या शिक्षणासाठी ज्या काही अडचणी येतात त्या येवू नये म्हणून त्यांनी इंव्हर्टर संच आणि विद्यार्थ्यांना सांस्कृतिक कार्यक्रम बघता यावा यासाठी एलईडी टिव्ही संच भेट म्हणून दिले. वडिलांच्या दशक्रिया दिवशी जवळपास ७९,००० रूपये किंमत असलेल्या या भेटवस्तू त्यांनी शाळेला सुपुर्द केल्या. दोन्ही शाळेचे मुख्याध्यापक व उप शिक्षक यांच्याकडे हि भेट सुपुर्द करण्यात आली. त्यांनी जपलेल्या या समाजभानाविषयी त्यांचे सर्वत्र कौतुक होत आहे.
याप्रसंगी चोपडा सहकारी सुतगिरणी चे संचालक अमृतराव वाघ, शेतकी संघाचे संचालक नारायण पाटील, प्रा.अशोक पवार अमळनेर, माजी उपसरपंच अनिल पाटील, उपेंद्र पाटील, चंद्रकांत पाटील, मनिष पाटील, राकेश पाटील यांच्यासह समाज बांधव मोठ्या संख्येने उपस्थित होते.
