टिम लोकप्रवाह, चोपडा दि. २७ – काल दिनांक २६ रोजी तालुक्यात अवकाळी पाऊस पडला. यावेळी मोठ्या प्रमाणात गारपीट व वादळ झाल्यामुळे शेतकऱ्यांच्या पिकांचे अतोनात नुकसान झाले आहे. यामध्ये मका, ज्वारी, हरभरा, केळी, दादर व गहू असे काढणीवर आलेल्या पिकाचे फार नुकसान झाले. शेतकऱ्याच्या तोंडी आलेला घास निसर्गाने हिरावून घेतला असे म्हटले तरी वावगे ठरणार नाही. त्यामुळे सदर झालेल्या नुकसानीचे तात्काळ पंचनामे करुन शेतकरी राजाला नुकसान भरपाई मिळावी याबाबत तहसीलदारांना निवेदन देण्यात आले. सदर निवेदन नायब तहसीलदार आर. आर. महाजन यांनी स्विकारले.
दिनांक २६ रोजी रात्री अचानक वादळ व गारपीटीसह पाऊस आल्याने तालुक्यातील अनेक गावातील शेतकऱ्यांचे अतोनात नुकसान झाले. तयार झालेली पिके जमीनदोस्त झाली असल्याने त्यांच्या पुढे आर्थिक संकट उभे राहले असून शेती करणेकामी लागलेला खर्च सुद्धा निघणार नसल्याने आता पुढे काय? या विवंचनेत पडले आहेत. राष्ट्रवादी काँग्रेस पक्ष शरद पवार गटाने सदर झालेल्या नुकसानीचे तात्काळ पंचनामे करुन राज्य सरकारने शेतकऱ्यांना भरपाई द्यावी, अशी निवेदनाद्वारे मागणी केली आहे.
सदर निवेदन देतेवेळी तालुकाध्यक्ष शशिकांत पाटील, कृषी उत्पन्न बाजार समिती उपसभापती विनायक चव्हाण, माजी पं.स. सभापती डी. पी. साळुंखे, शांताराम सपकाळे, तुकाराम पाटील, सुनील डोंगर पाटील, माजी नगरसेवक कैलास सोनवणे, भाऊसाहेब साळुंखे, युवक जिल्हा सरचिटणीस लहुश न्हायदे, दीपक वानखेडे, विशाल गवळी, शेखर पाटील, मच्छिंद्र पाटील, अमोल पाटील, भाईदास पाटील, इंद्रजीत पाटील व युवक शहराध्यक्ष समाधान माळी आदिंसह राष्ट्रवादी काँग्रेस पार्टीचे इतर पदाधिकारी व कार्यकर्ते उपस्थित होते.
