टिम लोकप्रवाह, चोपडा दि. ०१ – तालुक्यातील सर्व गावांमध्ये रविवार दिनांक 3 मार्च 2024 रोजी राष्ट्रीय पल्स पोलिओ लसीकरण मोहीम राबविण्यात येणार असून या मोहिमेअंतर्गत शून्य ते पाच वर्ष वयोगटातील सर्व बालकांना पोलिओ लसीचे दोन थेंब पाजण्यात येणार आहे. सदर मोहीम यशस्वी करण्यासाठी एकूण 195 बूथ तसेच 19 मोबाईल टीम, बाजार, एसटी स्टँड व नाके याठिकाणी नऊ ट्रांजिट टीम द्वारे लसीकरण करण्यात येणार आहे. सदर लसीकरण मोहीम तालुक्यातील सर्व गाव, पाडे, दुर्गमभाग, शेत शिवार व वीट भट्टी या सर्व ठिकाणी राबविण्यात येणार आहे. सदर मोहिमेमध्ये चोपडा तालुक्यातील एकूण 31 हजार 839 शून्य ते पाच वर्ष वयोगटातील बालकांना लसीकरण करण्याचे उद्दिष्ट निश्चित करण्यात आले आहे. सदर मोहीम यशस्वी करण्यासाठी आरोग्य विभाग, महिला बालकल्याण विभाग, शिक्षण विभाग, नगरपरिषद विभाग, स्थानिक स्वयंसेवी संस्था, स्वयंसेवक, आरोग्य कर्मचारी, अंगणवाडी सेविका व आशा सेविका यांचे मदतीने नियोजन करण्यात आले आहे. सदर मोहिमेचे सुसूत्रीकरण व समन्वय साधण्यासाठी तहसीलदार भाऊसाहेब थोरात यांचे अध्यक्षतेखाली तालुका टास्क फोर्स समितीची बैठक घेण्यात आली.
सदर बैठकीला गटविकास अधिकारी रमेश वाघ, नायब तहसीलदार सचिन बांबळे, तालुका आरोग्य अधिकारी डॉ. प्रदीप लासुरकर, गटशिक्षणाधिकारी अविनाश पाटील, बालविकास प्रकल्प अधिकारी संजय धनगर हे उपस्थित होते. सदर बैठकीमध्ये तालुक्यातील सर्व बालकांना वयोगटानुसार पोलिओ लसीचे दोन थेंब पाजण्याकरीता दक्षता घेणेबाबत सूचना करण्यात आल्या. तसेच सर्व पालकांनी आपल्या बालकांना घराजवळील पोलिओ बूथ वर जाऊन पोलिओ लसीचे लसीकरण करून घ्यावे, असे आवाहन सदर बैठकीमध्ये करण्यात आले. तसेच मंगळवारपासून तालुक्यातील ग्रामीण भागात तीन दिवस व शहरी भागात पाच दिवस तब्बल 187 पथकाद्वारे घरोघरी भेट देऊन सुटलेल्या बालकांचे लसीकरण करून घेण्यासाठी नियोजन करण्यात आले असल्याची माहिती तालुका आरोग्य अधिकारी डॉ. प्रदीप लासूरकर यांनी दिली आहे.
