टिम लोकप्रवाह, चोपडा दि. २६ – शहरातील विपश्यना साधकांच्या वतीने महिला मंडळ माध्यमिक विद्यालय च्या सांस्कृतिक हॉलमध्ये इयत्ता ५ वी ते १० वी तील विद्यार्थ्यांसाठी एक दिवसीय बाल आनापान शिबीर घेण्यात आले. शिबिरात ५५ विद्यार्थी व विद्यार्थिनींनी सहभाग नोंदविला.
नाकातून येणाऱ्या जाणाऱ्या श्वासाच्या निरीक्षणाने मनाला एकाग्र आणि शांत करणारी ही साधना विद्यार्थ्यांसाठी फायदेशीर आहे. त्यामुळे महाराष्ट्र शासनाने मित्र उपक्रमाच्या माध्यमातून प्रत्येक शाळेत परिपाठाच्या वेळी याचा उपयोग अभ्यासात घेण्यासंदर्भात परिपत्रक काढण्यात आले आहे. ही संपूर्णपणे वैज्ञानिक असलेली आणि कोणत्याही जाती-धर्माची संबंधित नसलेली, सर्वांसाठी विनामूल्य उपलब्ध असलेला ध्यान विधी आहे. चोपडा शहरात पहिल्यांदाच अशा प्रकारचे बाल शिबिर घेण्यात आले. दर महिन्याच्या चौथ्या रविवारी फेब्रुवारी महिन्यापासून बाल अनापान शिबिराचे आयोजन करण्यात येत आहे. तरी परिसरातील इतर शाळांनीही या शिबिराचा उपयोग विद्यार्थ्यांच्या हितासाठी करावा, असे आवाहन करण्यात आले आहे.
सदर शिबीरामुळे विद्यार्थ्यांची एकाग्रता वाढणे,
मनाचा चंचलपणा, बेचैनी व आळस कमी होणे,
चिंता, काळजी व ताणतणाव कमी होणे, स्मरणशक्ती व आत्मविश्वास वाढणे. नैराश्य, कंटाळा कमी होणे. सृजनशीलता आणि कार्यक्षमता वाढून चिडचिड कमी होणे आदि मुख्य फायदे विद्यार्थ्यांना होतात. या सर्वांचा सकारात्मक प्रभाव विद्यार्थ्यांच्या अभ्यास, गुणवत्ता विकास व जीवनात दिसून येतो.
