टिम लोकप्रवाह, चोपडा दि. २८ – सर्वसामान्य नागरिक व आरोग्य विभाग या दोघांमधील महत्वाचा दुवा असणाऱ्या आशा स्वयंसेविका व गटप्रवर्तक यांनी जनसामान्यांना दिलेल्या आरोग्यसेवेबद्दल त्यांचे कौतुक व्हावे व त्यांच्या सुप्त कलागुणांना वाव मिळावा या उद्देशाने दिनांक २७ जानेवारी रोजी चोपडा नगरपरिषदेच्या नाट्यगृहात आशा दिन उत्साहात साजरा करण्यात आला. यावेळी व्यासपीठावर उपजिल्हाधिकारी गजेंद्र पाटोळे, तहसीलदार भाऊसाहेब थोरात, गट विकास अधिकारी रमेश वाघ व तालुका आरोग्य अधिकारी डॉ. प्रदिप लासुरकर आदिंची प्रमुख उपस्थिती होती.
चोपडा तालुक्यात ग्रामीण भागात कार्यरत 225 ग्रामीण, शहरी भागातील 33 व 14 गटप्रवर्तक कार्यरत आहेत. सर्वसामान्य नागरिकांना दिलेल्या आरोग्यसेवेबद्दल त्यांचे कौतुक व्हावे त्याबरोबरच त्यांच्या सुप्त कलागुणांना वाव मिळावा यासाठी नगरपालिका नाट्यगृह चोपडा येथे आशा दिवस साजरा करण्यात आला. याप्रसंगी कार्यक्रमाचे अध्यक्ष गट विकास अधिकारी रमेश वाघ यांच्या हस्ते दिप प्रज्वलन करून कार्यक्रमाला सुरुवात करण्यात आली. कार्यक्रमाचे प्रास्ताविक तालुका आरोग्य अधिकारी डॉ. प्रदीप लासुरकर यांनी केले.
याप्रसंगी तालुक्यातील प्राथमिक आरोग्य केंद्र स्तरावरील सर्वोत्कृष्ट कार्य करणाऱ्या आशा स्वयंसेविकांना सन्मानित करण्यात आले. यामध्ये अडावद येथील शोभा प्रवीण गायकवाड, चहार्डी येथील मीना युवराज पाटील, धानोरा येथील हपशान अरमान तडवी, गोरगावले येथील शीतल शरद पाटील गोरगावले, हातेड येथील हेमलता महेंद्रसिंग राजपूत, लासुर येथील दिपाली सुनील ढिवरे, वैजापूर येथील सुरमी बुधा पावरा व चोपडा नगरपालिका क्षेत्रातून हिना अयाज पिंजारी आदि आशा स्वयंसेविकांना उपस्थित मान्यवरांच्या हस्ते प्रशस्तीपत्र, पुष्पगुच्छ व भेटवस्तू देवून गौरविण्यात आले.
याप्रसंगी आशांनी काढलेल्या रांगोळीमध्ये प्रथम क्रमांक प्राथमिक आरोग्य केंद्र, धानोरा, व्दितीय क्रमांक प्राथमिक आरोग्य केंद्र, चहार्डी, तर तृतीय क्रमांक शहरी आरोग्य केंद्र, चोपडा शहर यांना देवून गौरविण्यात आले.
गटविकास अधिकारी रमेश वाघ यांनी अध्यक्षीय भाषणात आशा स्वयंसेविकांच्या उल्लेखनीय कामगिरीबद्दल कौतुक केले. तसेच उपजिल्हाधिकारी तथा निवडणूक अधिकारी गजेंद्र पाटोळे यांनी आशांनी जास्तीत जास्त मतदारांना मतदान करण्याबाबत जनजागृती करण्याचे आवाहन केले. तसेच ”होय मी मतदान करणार” अशी सर्व आशा स्वयंसेविकांबाबत प्रतिज्ञा घेतली.
तसेच तालुक्याचे वरिष्ठ क्षयरोग प्रयोगशाळा पर्यवेक्षक किशोर सैंदाणे यांनी क्षयरोग दिनानिमित्त आशांनी केलेल्या कामगिरीबद्दल मार्गदर्शन करून त्यांना प्रोत्साहन दिले. कार्यक्रमाचे सूत्रसंचलन विस्तार अधिकारी सुशील सोनवणे यांनी केले तर आभार प्रदर्शन किशोर सैंदाणे यांनी केले. कार्यक्रम यशस्वीतेसाठी जगदीश बाविस्कर, जितेंद्र मोरे, प्रमोद पाटील, दिलावरसिंग वळवी, कमलेश बडगुजर, किशोर सैंदाणे, राजु पवार, गजानन करंदीकर, तालुका समूह संघटक सागर शिंपी, जयश्री तायडे व ज्योती सोनवणे आदिंनी परिश्रम घेतले.
