टिम लोकप्रवाह, वर्धा दि. 25 – वर्ध्यातील नामवंत तरुण तबला आकाश चांदूरकर यांचा नागपूर वरून वर्धेला येत असताना सेलडोह नजीक अपघात झाला असून यामध्ये त्यांचे रात्री आठ वाजता निधन झाले. सावंगी येथील रुग्णालयात त्यांना उपचाराकरिता आणण्यात आले होते. परंतु उपचारापूर्वीच त्यांचे निधन झाले.
ते नागपूर येथे आकाशवाणी केंद्रामध्ये एका रेकॉर्डिंग करीता स्वतःच्या दुचाकीने ते गेले होते. परतीच्या प्रवासामध्ये ते सेलडोह नजीक रस्त्यामध्ये पडून दिसले. सदर अपघात कशाने झाला हे मात्र कळु शकले नाही. त्यांच्याजवळ असलेल्या आधारकार्डमुळे त्यांची ओळख पटली. स्थानिकांनी त्यांना पुढील उपचारासाठी तात्काळ रुग्णवाहिकेद्वारे पाठविले मात्र उपचारापूर्वीच त्यांची प्राणज्योत मावळली. त्यांच्या या अकस्मात निधनाने सर्वत्र हळहळ व्यक्त होत आहे.
