टिम लोकप्रवाह, चोपडा दि. 12 – येथील कै. हि. मो. करोडपती माध्यमिक विद्यालयात त्रिशा फॉउंडेशन, चोपडा तर्फे गरीब, होतकरू व आदिवासी विद्यार्थ्यांना डॉ. कल्पेश बेहडे, डॉ. प्रियंका बेहडे व त्यांच्या परिवारातील सदस्यांनी शाळेतील विद्यार्थी व विद्यार्थिनींना नोटबुक, रंगपेटी, दप्तर आदी शैक्षणिक साहित्याचे वितरण केले तसेच यावेळी इयत्ता 8 वी ते इयत्ता 10 वी च्या किशोरवयीन मुलींना सॅनेटरी पॅड नॅपकिनचे वाटप करण्यात आले.
चोपडे शहरात गेल्या 45 वर्षांपासून दंतरोग चिकित्सक म्हणून सेवा देत असलेले, त्रिशा फॉउंडेशन चे संस्थापक अध्यक्ष डॉ. सतीश बेहडे यांच्या सामाजिक उत्तरदायित्वाच्या भूमिकेतून व संकल्पनेतून शहरातील गरीब व होतकरू विद्यार्थांना विविध शैक्षणिक साहित्याचे वितरण करण्यात येते. त्यानुसार विद्यालयातील आदिवासी विद्यार्थी व विद्यार्थिनींना शिक्षणासाठी मदत व्हावी व प्रोत्साहन मिळावे. या उदात्त हेतूने परिवारातील सदस्यांनी शैक्षणिक साहित्य वाटप केले.
याप्रसंगी मुख्याध्यापक मंगेश भोईटे यांनी संस्थेच्या व विद्यालयाच्या वतीने या उपक्रमाबद्दल आभार मानले. याप्रसंगी आर. आर. बडगुजर, ए. पी. बडगुजर, श्रीमती सी. पी. बडगुजर, श्रीमती व्ही. बी. साळुंखे, श्रीमती पी. सी. बडगुजर, श्रीमती एस. टी. बोरसे, शर्मिला बडगुजर, संजोग साळुंखे उपस्थित होते. सदर कार्यक्रमाच्या यशस्वीतेसाठी अशोक बडगुजर, सुनील बडगुजर यांनी सहकार्य केले.
