टिम लोकप्रवाह, चोपडा दि. 29 – केंद्र शासनाच्या युवा कार्यक्रम आणि खेल मंत्रालय अंतर्गत स्वायत्त संस्था मेरा युवा भारत, जळगाव यांच्या मार्गदर्शनातून भगिनी मंडळ संचलित कला व वाणिज्य महाविद्यालयातील राष्ट्रीय सेवा योजना विभागाच्या वतीने हॉकीचे जादूगर मेजर ध्यानचंद यांची जयंती अर्थातच राष्ट्रीय खेल दिवस महाविद्यालयात साजरा करण्यात आला. कार्यक्रमाची सुरुवात मेजर ध्यानचंद यांच्या प्रतिमेचे पूजन व माल्यार्पण करून झाली. यावेळी प्रमुख पाहुणे म्हणून प्राचार्य डॉ. ईश्वर सौंदाणकर, उपप्राचार्य डॉ.आशिष गुजराथी, डॉ.अनंत देशमुख, प्रा. नारसिंग वळवी, डॉ. विनोद रायपुरे आदिंची उपस्थिती होती.
राष्ट्रीय खेल दिनानिमित्त भगिनी मंडळ संचलित कला व वाणिज्य महाविद्यालयातील विद्यार्थिनींसाठी गोळा फेक स्पर्धेचे आयोजन करण्यात आले होते. यामध्ये तब्बल ४१ विद्यार्थिनींनी उत्स्फूर्तपणे सहभागी होत गोळाफेक केले, यावेळी प्रा. समाधान सोनवणे यांनी गोळा फेक स्पर्धेच्या नियमावली विषयी विद्यार्थिनींना मार्गदर्शन केले. या स्पर्धेत प्रिया राजेंद्र चव्हाण, दिव्या संजय महाजन, मनिषा जयसिंग पावरा, श्वेता प्रकाश सोनवणे हे विजेते ठरले. विजेत्यांना मान्यवरांच्या हस्ते शालेय पॅड, पेन व पुस्तक देवून गौरविण्यात आले.
त्यानंतर रासेयो प्रमुख कार्यक्रम अधिकारी प्रा. अनिल बाविस्कर यांनी ‘खेल निती – २०२५’ बद्दल उपस्थित विद्यार्थ्यांना मार्गदर्शन केले. सदर कार्यक्रमासाठी मेरा युवा भारतचे जिल्हा युवा समन्वयक अशोक मेघवाल यांचे मार्गदर्शन लाभले. कार्यक्रमाचे सूत्रसंचालन विद्यार्थी विकास अधिकारी प्रा. सुनिल पाचवणे यांनी केले तर रासेयो महिला कार्यक्रम अधिकारी प्रा. मोहिनी पाटील यांनी आभार मानले. सदर कार्यक्रम यशस्वीतेसाठी प्रा. अनिल बाविस्कर, प्रा. समाधान सोनवणे, प्रा. सुनिल पाचवणे, प्रा. भाग्यश्री महाजन, प्रा. मोहिनी पाटील, प्रथमेश भावसार, परेश चित्ते, अजय बारी, चंद्रकांत पाटील, सुरेश सपकाळे, देवेंद्र पाटील यांच्यासह प्रतिक कोळी, विनय जैन, भावेश कोळी आदींनी परिश्रम घेतले. कार्यक्रमानंतर सर्वांसाठी अल्पोपहाराची व्यवस्था करण्यात आली होती.
