टिम लोकप्रवाह, चोपडा दि. 30 – तालुक्यातील नागलवाडी येथील माध्यमिक विद्यालयात साने गुरुजी कथामालेचे पहिले पुष्प गुंफण्यात आले. सर्वप्रथम पू. साने गुरुजी यांच्या प्रतिमेचे पूजन व माल्यार्पण मुख्याध्यापक पी. डी. पाटील, प्रताप विद्या मंदिर शाळेचे उपशिक्षक विजय गोसावी व उपस्थित शिक्षकवृंदाच्या हस्ते करण्यात आले.
याप्रसंगी शाळेतील विद्यार्थिनींनी साने गुरुजींच्या “बलसागर भारत होवो” या गीताचे सादरीकरण केले. प्रमुख वक्त्यांचा परिचय शाळेचे उपशिक्षक नवनीत राजपूत यांनी करून दिला. कार्यक्रमाच्या प्रास्ताविकेतून शाळेचे मुख्याध्यापक पी. डी. पाटील यांनी या उपक्रमाचा मुख्य उद्देश स्पष्ट केला. या कथामालेचे पहिले पुष्प गुंफण्याचा मान प्रताप विद्या मंदिर शाळेचे विद्यार्थी शिक्षक विजय गोसावी यांना देण्यात आला. यावेळी त्यांनी आपल्या मनोगतातून साने गुरुजी यांच्या विचारांनी विद्यार्थ्यांना मंत्रमुग्ध केले. मुलांनी साने गुरुजी यांचे विचार कृतीतून दाखवून द्यावेत हा संदेश त्यांनी यावेळी दिला.
कार्यक्रमाचे सूत्रसंचालन दिपक राजपूत यांनी तर आभार एस. पी. बऱ्हाटे केले. यावेळी शाळेचे सर्व शिक्षकवृंद व शिक्षकेतर कर्मचारीवृंद उपस्थित होते.
