लोकप्रवाह, चोपडा दि. ०९ जुलै – दिनांक ३०/०६/२०२२ रोजी चोपडा शहरातील त्र्यंबक नगर व सहकार नगर याठिकाणी भरदिवसा घराफोडी करीत जवळपास ५ लाखाचा मुद्देमाल लंपास करण्यात आला होता. त्या अनुषंगाने पोलीस प्रशासनाकडून तपासाची चक्रे फिरविण्यात आली व अवघ्या दहा दिवसाच्या आत अट्टल घरफोड्या जिम्मी उर्फ दिपक विपीन शर्मा याला नंदूरबार येथून स्थानिक गुन्हे शाखा, जळगांव येथील पथकाने ताब्यात घेत अटक करण्यात आली.
सदर आरोपी हा इतका सराईत आहे की अवघ्या ३ मिनीटात मोठया स्वरुपाची घरफोडी करून मिळालेल्या पैश्यांनी मुंबई येथे जावून तेथून विमानाने दिल्ली, हरीयाणा, राजस्थान, गुजरात येथे पलायन करतो. तेथे मौजमजा करून तेथे पुन्हा मोठ्या स्वरूपाची घरफोडी करून तेथून पुन्हा विमानाने पलायन करतो. त्याचेवर इतर राज्यातदेखील ३० ते ४० गुन्हे दाखल आहेत.
याबाबत सविस्तर वृत्त असे की, दिनांक ३०/०६/ २०२२ रोजी या एकाच दिवशी चोपडा शहरात २ व अमळनेर शहरात १ अशी मोठ्या स्वरूपाच्या भरदिवसा घरफोड्या झाल्या होत्या. त्यावेळी पोलीस अधीक्षक डॉ. प्रविण मुंढे व अप्पर पोलीस अधीक्षक रमेश चोपडे यांनी स्थानिक गुन्हे शाखेचे पोलीस निरीक्षक किरणकुमार बकाले यांना सदर तपासाबाबत आदेश दिले. त्यावरून किरणकुमार बकाले यांनी त्यांचे स्वतंत्र पथक तयार करुन त्यात स.फौ. रवि नरवाडे, पो.हे.काँ. संजय हिवरकर, राजेश मंढे, संदिप पाटील, प्रविण मांडोळे, परेश महाजन, मुरलीधर बारी सर्व नेमणुक स्थानिक गुन्हे शाखा, जळगाव यांचे पथक नेमण्यात आले होते.
स्थानिक गुन्हे शाखा, जळगांवकडील वरील पथक हे चोपडा व अमळनेर तालुक्यात फिरून गुप्त बातमीदारांमार्फत माहिती काढत असतांना पोलीस निरीक्षक किरणकुमार बकाले यांना गुप्त बातमीदारा मार्फत बातमी मिळाली की, चोपडा व अमळनेर शहरात भरदिवसा झालेल्या घरफोडया करण्याची पध्दत एकच असल्याने सदरच्या घरफोडयांमध्ये मिळालेल्या तांत्रिक पुराव्यावरून सदरच्या घरफोडया या जिम्मी शर्मा रा. नदुरबार याने केल्याचे समजुन आल्याने पोलीस निरीक्षक किरणकुमार बकाले यांनी पथकास तात्काळ नंदुरबार येथे रवाना केले. जिम्मी शर्मा रा. नंदुरबार हा रेकॉर्डवरील दशहत माजवणारा गुंड प्रवृत्तीचा असल्याने त्याची गोपनीय माहिती काढून त्यास शिताफीने पकडून त्यास त्याचे नाव-गाव विचारले असता त्याने त्याचे नाव जिम्मी उर्फ दिपक विपीन शर्मा, वय २९, रा. गुरुकुल नगर नंदुरबार असे सांगितले. नंतर त्यास विश्वासात घेवून विचारपुस केली असता त्याने १) चोपडा शहर पो.स्टे. CCTNS NO. २७२ / २०२२, २) चोपडा शहर पो.स्टे. CCTNS NO.२७३/२०२२, ३) अमळनेर पो.स्टे. CCTNS NO. ३०३/२०२२ या ३ घरफोडी त्यानीच केल्याचे कबुली दिली असून त्यास गजाआड करण्यात आले.
