लोकप्रवाह,चोपडा दि. १० जुलै : येथील प्रताप विद्या मंदिराने आषाढी एकादशीचे औचित्य साधत शहरात भव्य व नयनरम्य अशा ज्ञानदिंडीचे आयोजन केले. गावातील विभागाच्या विद्यार्थ्यांचा प्रमुख सहभाग असलेल्या या दिंडीने शहरातील सर्व परिसर विठ्ठल नामाच्या गजरात दुमदुमून गेला. ज्ञान दिंडीच्या माध्यमातून प्रताप विद्या मंदिराच्या विविध विभागांनी पथनाट्य व गीते सादर करत समाज प्रबोधनाचा वसा आणि वारसा या दिंडीच्या निमित्ताने पुढे चालवला. महाराष्ट्रातील संत परंपरेने केलेल्या समाज प्रबोधनावर सकाळ विभागाच्या विद्यार्थ्यांनी उपशिक्षक पंकज शिंदे यांच्या मार्गदर्शनाखाली समाजप्रबोधनपर पथनाट्य सादर केले. तसेच समाजासमोर भेडसावणाऱ्या कोरोना सारख्या विविध समस्यांवर भाष्य करणारे एक द्विपात्री नाटक दुपार विभागाच्या विद्यार्थ्यांनी तुषार लोहार यांच्या मार्गदर्शनाखाली सादर केले. स्वच्छतेचा संदेश देत गाडगेबाबांचा संदेश समाजात रुजविण्याच्या हेतूने गावातील विभागाच्या विद्यार्थ्यांनी पथनाट्य सादर केले, त्यांना सर्व शिक्षक भगिनींचे मार्गदर्शन लाभले. तर याच विद्यार्थ्यांनी के बी पाटील यांच्या मार्गदर्शनाखाली माऊली माऊली या गीतावर नृत्य सादर केले. उच्च माध्यमिक विभागातील विद्यार्थिनींनी देखील पी. पी. शिंदे यांच्या मार्गदर्शनाखाली कोरोना जनजागृती विषयक पथनाट्य सादर करत समाजप्रबोधनाचे कार्य केले.
विठू माऊलीच्या नामघोषाने टाळ मृदंगाच्या गजरात आयोजित केलेल्या या ज्ञान दिंडी सोहळ्यात विद्यार्थी व विद्यार्थिनींनी विठ्ठल रुक्माई च्या वेशात समाज प्रबोधनाचे कार्य केले. वृक्षारोपण करून पर्यावरण संवर्धनाचा संदेश कृतीतून उतरवला गेला.यावेळी शाळेच्या प्रांगणात शिक्षकांच्या रिंगण सोहळ्याने कार्यक्रमाची सांगता झाली. या कार्यक्रमासाठी संस्थेच्या सचिव माधुरी मयूर, प्रताप विद्या मंदिराचे मुख्याध्यापक प्रशांत गुजराथी, उपमुख्याध्यापक एस जी डोंगरे, उपप्राचार्य जे एस शेलार, पर्यवेक्षक पी डी पाटील, एस एस पाटील, एम डब्ल्यू पाटील, प्राथमिक विभागाचे मुख्याध्यापक एस एच पाटील, समन्वयक गोविंद गुजराथी तसेच विविध ज्ञान शाखांचे पदाधिकारी, सर्व विभागातील शिक्षक व शिक्षकेतर कर्मचारी आणि विद्यार्थी यांची उपस्थिती होती.
