टिम लोकप्रवाह, चोपडा दि. 01 : शहरातील स्वामीनारायण मंदिर परिसरात तरस (तडस) दिसल्याने नागरिकांमध्ये निर्माण झालेल्या भीतीबाबत ‘लोकप्रवाह न्यूज’ने सविस्तर वृत्त प्रसिद्ध केले होते. या वृत्ताची दखल घेत वन विभागाने तातडीने कार्यवाही करत दि. 31 जुलै 2026 रोजी स्वामीनारायण मंदिर परिसरात पाहणी केली.
चोपडा वनपरिक्षेत्र अधिकारी श्री. बी. डी. कुवर यांच्या मार्गदर्शनाखाली वनरक्षक विजय शिरसाठ यांनी परिसरातील नागरिकांशी संवाद साधला. यावेळी तरस या वन्यजीवाबाबत नागरिकांना सविस्तर माहिती देण्यात आली तसेच वन्यप्राण्यापासून काळजी घेण्याबाबत आवश्यक सूचना करण्यात आल्या.
तरस हा भारतातील कोरड्या जंगलांमध्ये, गवताळ प्रदेशात आणि डोंगराळ भागात आढळणारा वन्यजीव आहे. तो प्रामुख्याने रात्री सक्रिय असतो. तरस बहुतांश वेळा मृत प्राण्यांचे अवशेष खात असल्याने जंगलातील मृत अवशेषांची विल्हेवाट लावून परिसंस्था स्वच्छ ठेवण्याचे महत्त्वपूर्ण काम करतो. गरजेनुसार तो लहान प्राणी, पक्षी किंवा फळेही खातो.
सामान्यतः तरस माणसांपासून दूर राहणे पसंत करतो, त्यामुळे नागरिकांनी घाबरून न जाता सतर्क राहावे, असे वन विभागाच्या पथकाने सांगितले. परिसरात वन्यप्राणी आढळल्यास त्याच्या जवळ जाऊ नये, त्याला त्रास देऊ नये तसेच गर्दी करू नये, अशा सूचनाही नागरिकांना देण्यात आल्या. दरम्यान, कुठलाही प्रसंग उद्भवल्यास नागरिकांनी तात्काळ वन विभागाशी संपर्क साधावा, असे आवाहन वन विभागाच्या वतीने करण्यात आले आहे.
‘लोकप्रवाह न्यूज’ने नागरिकांच्या सुरक्षिततेच्या दृष्टीने या विषयाला प्राधान्य देत बातमी प्रसिद्ध केली होती. त्यानंतर वन विभागाने तातडीने दखल घेत परिसराची पाहणी करून नागरिकांना मार्गदर्शन केल्याने परिसरातील नागरिकांना दिलासा मिळाला आहे.
वन विभागाकडून परिस्थितीवर लक्ष ठेवण्यात येत असून नागरिकांनीही वन विभागाला सहकार्य करावे आणि वन्यजीवाबाबत कोणतीही माहिती मिळाल्यास ती तात्काळ संबंधित अधिकाऱ्यांना कळवावी, असे आवाहन करण्यात आले आहे.
