टिम लोकप्रवाह, चोपडा, दि. २ : अडावद पोलीस ठाण्याच्या हद्दीतील वडती (ता. चोपडा) येथे रविवारी पहाटे घडलेल्या हृदयद्रावक घटनेने संपूर्ण परिसर हादरला आहे. झोपेत असलेल्या स्वतःच्या दोन मुलांवर पित्याने धारदार हत्याराने जीवघेणा हल्ला केल्याची धक्कादायक घटना घडली. या हल्ल्यात मीरा सुभाष भिलाला हिचा दुर्दैवी मृत्यू झाला असून तिचा भाऊ रामू सुभाष भिलाला गंभीर जखमी झाला आहे. त्याच्यावर जळगाव येथील सिव्हिल हॉस्पिटलमध्ये उपचार सुरू आहेत.
पोलिसांकडून मिळालेल्या माहितीनुसार, सुभाष गोपाल भिलाला (वय ५०) हा वडती येथील पाण्याच्या टाकीजवळील झोपडीत राहत होता. रविवारी पहाटेच्या सुमारास त्याची दोन्ही मुले झोपेत असताना त्याने त्यांच्यावर धारदार कुऱ्हाडीने हल्ला केल्याची प्राथमिक माहिती आहे. या हल्ल्यात मीरा हिचा घटनास्थळीच मृत्यू झाला, तर रामू गंभीर जखमी झाला.
घटनेनंतर आरोपी जंगलात पसार
घटना घडल्यानंतर संशयित आरोपी घटनास्थळावरून पसार झाला आणि जवळील जंगल परिसरात लपून बसल्याची माहिती पोलिसांना मिळाली. घटनेचे गांभीर्य लक्षात घेऊन चोपडा उपविभागीय पोलीस अधिकारी सुनील पाटील यांच्या मार्गदर्शनाखाली अडावद पोलीस ठाण्याचे सहायक पोलीस निरीक्षक प्रशांत कडारे व त्यांच्या पथकाने तातडीने शोधमोहीम सुरू केली. पोलिसांनी जंगल परिसरात शोध घेत संशयित आरोपीला ताब्यात घेतले. त्याला पोलिस वाहनातून पुढील कारवाईसाठी नेण्यात आले. या कारवाईदरम्यानचे फोटोही समोर आले आहेत.
घटनास्थळी फॉरेन्सिक पथकाची पाहणी
घटनेची माहिती मिळताच पोलीस अधिकारी व कर्मचारी घटनास्थळी दाखल झाले. फॉरेन्सिक पथकाने घटनास्थळाची पाहणी करून आवश्यक पुरावे संकलित केले. पोलिसांनी घटनास्थळाचा पंचनामा करून तपासाच्या दृष्टीने महत्त्वाचे पुरावे ताब्यात घेतले आहेत.
हल्ल्यामागील नेमके कारण काय?
प्राथमिक माहितीनुसार, संशयित आरोपी दारूच्या आहारी असल्याचे सांगितले जात आहे. मात्र, त्याने स्वतःच्या मुलांवर एवढा गंभीर हल्ला का केला, याचे नेमके कारण अद्याप स्पष्ट झालेले नाही. कौटुंबिक वाद, मद्यधुंद अवस्थेतील राग किंवा अन्य काही कारण या घटनेमागे आहे का, याचा तपास पोलीस करीत आहेत. दरम्यान, संशयित आरोपी काही दिवसांपूर्वीच कारागृहातून बाहेर आल्याची चर्चा परिसरात आहे. या बाबीचीही पोलीस पडताळणी करीत आहेत.
खून व खुनाच्या प्रयत्नाचा गुन्हा दाखल
याप्रकरणी सौ. मायाबाई सुभाष भिलाला यांच्या फिर्यादीवरून अडावद पोलीस ठाण्यात गु.र.नं. १५३/२०२६ नुसार भारतीय न्याय संहितेच्या कलम १०३(१) (खून) व १०९(१) (खुनाचा प्रयत्न) अन्वये गुन्हा दाखल करण्यात आला आहे. संशयित आरोपी सध्या पोलिसांच्या ताब्यात असून त्याची चौकशी सुरू आहे.
या घटनेने वडती गावासह संपूर्ण चोपडा तालुक्यात खळबळ उडाली असून, पित्याकडून स्वतःच्या मुलांवर झालेल्या या कथित हल्ल्याबाबत परिसरात हळहळ व्यक्त होत आहे. पुढील तपास चोपडा उपविभागीय पोलीस अधिकारी सुनील पाटील यांच्या मार्गदर्शनाखाली सहायक पोलीस निरीक्षक प्रशांत कडारे करीत आहेत.
