लोकप्रवाह, चोपडा दि. १६ जुलै – शहरातील पोद्दार शाळेच्या प्राथमिक विभागाने “मंदिर – मशिद दर्शन” उपक्रमामुळे नागरिक व पालकांमध्ये असंतोषाचे वातावरण निर्माण झाले असून चौकशी करुन संबधितांवर तात्काळ कठोर कारवाई करण्याची मागणी निवेदनाद्वारे हिंदुत्ववादी संघटनातर्फे गटशिक्षणाधिका-यांकडे करण्यात आली आहे.
याबाबत अधिक माहिती अशी की, पोद्दार शाळेच्या प्रशासनाने प्रथमिक विभागाच्या विद्यार्थ्यांसाठी दि.९ जुलैला मंदिर – मशीद दर्शन हा सनसनाटी आणि असंतोष पसरविणारा उपक्रम राबविला. त्या अंतर्गत श्री विठ्ठल मंदिरात दर्शन झाल्यानंतर शहरातील एका मशिदीत विद्यार्थ्यांना नेण्यात आले. त्यामुळे नागरिक व हिंदुत्ववादी कार्यकर्ते संतप्त झाले. त्यांनी संबधितांना जाब विचारला तसेच गटशिक्षणाधिकारी डॉ. भावना भोसले यांना निवेदन सादर केले.
या निवेदनात म्हटले आहे की, उदयपूर व अमरावती या ठिकाणी अत्यंत क्रुर घटना घडल्या असतांना व सर्वत्र सामाजिक वातावरण दूषित असतांना संवेदनशील चोपडा शहरात मंदिर मशीद दर्शन उपक्रम कसा राबविला गेला? त्यासाठी शिक्षण विभागाची परवानगी घेतली होती का? विद्यार्थी पारंपारिक वेषभूषेत होते ते भगव्या ध्वजासह मशिदीत जाताना कोणी माथेफिरूने गैरकृत्य केले असते तर त्याची जबाबदारी कुणाची? पोद्दार शाळेने विचित्र उद्देशाने हा वातावरण दूषित करणारा उपक्रम राबविला आहे. त्यामुळे या शाळेच्या विश्वस्त व त्यास जबाबदार शिक्षकांवर कठोर कारवाई करण्यात यावी. यापुढे तालुक्यात शालेय उपक्रम राबवितांना शिक्षण विभागाच्या परवानगीचे बंधन असावे अशी मागणी करण्यात आली आहे.
या निवेदनावर भाजपचे शहराध्यक्ष गजेंद्र जैसवाल, हिंदु जनजागृती समितीचे जिल्हा संयोजक डॅा.राहुल चौधरी, यशवंत चौधरी, शिवसेना शहरप्रमुख नरेश महाजन, रा.स्व.संघाचे कार्यवाह मनोज विसावे, राजेंद्र स्वामी, गौरव अग्रवाल, शाम सोनार, गौरव सोनार, भाजप सरचिटणीस मनोहर बडगुजर, सुनिल सोनगिरे, भाजयुमोचे प्रकाश पाटील, लक्ष्मण माळी, राजवर्धन पाटील, अजय भोई, विशाल भोई, संग्राम परदेशी, संदीप भोई, संदीप सांगोरे, जितेंद्र महाजन, भरतसिंह राजपुरोहित, प्रवीण चौधरी, किशोर चौधरी आदिंच्या स्वाक्ष-या आहेत.
