लोकप्रवाह, चोपडा दि. ०१ आॕगस्ट – तालुक्यातील अडावद येथील गणेश शशिकांत कासार या तरूणाची जगातील आघाडीचे सर्च इंजिन असलेल्या गुगल कंपनीत सॉफ्टवेअर इंजिनिअर म्हणून निवड झाली आहे. ग्रामीण भागात शिक्षण घेत जगातल्या मोठ्या कंपनीमध्ये नोकरी मिळविणे खूप अभिमानास्पद बाब आहे. सॉफ्टवेअर इंजिनिअर असणाऱ्या गणेश कासार याने आपल्या गुणवत्तेच्या जोरावर ही संधी मिळवली. ग्रामीण भागातील गणेशने आपल्या गुणवत्तेच्या कौशल्यावर घेतलेली गगनभरारी इतर विद्यार्थ्यांसाठी प्रेरणादायी ठरणारी आहे.
गुगल…इंटनेटचा वापर करणाऱ्या प्रत्येकासाठीच हे नाव अत्यंत जिव्हाळ्याचं. गुगल हे महाजालावरचं लोकप्रिय सर्च इंजिन. गुगलच्या सर्च इंजिनमध्ये मजकूर टाकायचा अवकाश की काँम्पुटर स्क्रीनवर हजारो पर्याय दिसू लागतात, अश्या या गुगल कंपनीत चोपडा तालुक्यातील अडावद येथील गणेश शशिकांत कासार या युवकाची सॉफ्टवेअर इंजिनिअर म्हणून निवड होणे अडावदसह संपुर्ण तालुक्याकरीता भुषणावह बाब असुन गणेशच्या या नेत्रदीपक कामगिरीने अडावद गावासह तालुक्याच्या शिरपेचात मानाचा तुरा रोवला गेला आहे. अत्यंत हुशार असलेला गणेश याने कठोर मेहनत व अभ्यासाचे व्यवस्थित नियोजन करून यश संपादन केले. गणेशचे प्राथमिक शिक्षण अडावद येथील ब.ग.ट्रस्ट च्या नूतन प्रायमरी इग्लिश मेडीयम स्कुल मध्ये तर माध्यमिक चोपडा येथील मेमोसा विद्यालय आणि उच्च माध्यमिक शिक्षण महात्मा गांधी शिक्षण मंडळाच्या कला,शास्त्र व वाणिज्य महाविद्यालय, चोपडा येथे झाले नंतर सांगली येथील वालचंद कॉलेजला इंजिनियरींगचे शिक्षण घेत असतानाच पहिल्याच प्रयत्नात त्याने आपल्या गुणवत्तेच्या जोरावर जगातील एक नंबरची कंपनी असलेल्या ‘गुगल’ मध्ये स्थान मिळविले.
यानिमित्त चोपडा महाविद्यालयात गणेशचा समारंभपूर्वक सत्कार उपप्राचार्य बी.एस.हळपे यांनी केला. गणेश हा अडावद येथील व्यापारी गौरव सेल्सचे संचालक शशिकांत प्रभाकर कासार यांचा सुपुत्र आहे. त्याच्या या दैदीप्यमान यशाने येथील कासार कुटुंबियांवर असलेला सरस्वती मातेचा वरदहस्त आशिर्वाद कायम असल्याचे पुन्हा एकदा सिध्द झाले आहे. दरम्यान अडावद गावाच्या नावलौकिकात भर घालणारी कामगिरी करणाऱ्या गणेश शशिकांत कासार याचे चोपडा तालुक्यासह पंचक्रोशीतून अभिनंदन होत आहे.
