कोरोनाच्या प्रादुर्भावामुळे गेल्या 2 वर्षांमध्ये कडक निर्बंध असल्याने यंदा गणेशोत्सव शासनाच्या व न्यायालयाच्या नियमांतर्गत साजरा होणार आहे. मागील काही महिन्यांपासून राज्यातील नागरिकांना हळूहळू सूट देण्यात आली होती. आता यंदा श्री गणेशाचं स्वागत मंडळे धुमधडाक्यात करू शकणार आहेत. कारण राज्य सरकारने एक मोठी खुशखबर दिली आहे.
राज्याचे मुख्यमंत्री एकनाथ शिंदे म्हणाले, ” गणेशोत्सव सुरू झाल्यानंतर शेवटच्या 5 दिवसांत मंडळांना रात्री 12 वाजेपर्यंत गणेशोत्सव सुरू ठेवण्यास परवानगी असणार आहे. यामुळे यावर्षीचा गणेशोत्सव धुमधडाक्यात करू, मात्र कोरोनाचे अनेक व्हेरियंट येत असून त्याविषयक देखील काळजी घेणं गरजेचं आहे. मंडळे सामाजिक कामे करत आहेत, त्याच पद्धतीने मंडळांनी सामाजिक उपक्रम म्हणून बुस्टर डोस जनतेपर्यंत पोहचविण्याचे काम करावे. दहीहंडी मंडळालाही परवानग्या दिल्या आहेत” असेही शिंदे यांनी माहीती दिली आहे.
आगामी गणेशोत्सवाच्या पार्श्वभूमीवर ते म्हणाले, “न्यायालयाच्या नियमांचे काटेकोरपणे पालन करून यंदाचा गणेशोत्सव उत्साहात, धूमधडाक्यात साजरा करू. गणेशोत्सव मंडळांना कोणत्याही प्रकारची अडचण येणार नाही, गणेशोत्सवाच्या अखेरच्या पाच दिवसात रात्री बारा वाजेपर्यंत स्पिकर वाजविण्यास परवानगी असणार आहे,” असे मुख्यमंत्री एकनाथ शिंदे यांनी काल मंगळवारी (2 ऑगस्ट) रात्री उशीरा स्पष्ट केलं आहे.
दरम्यान गणेशोत्सव काळात कोणी कायदा सुव्यवस्था बिघडवण्याचा काम करत असेल तर पोलिस प्रशासन त्यांच्यावर नक्कीच कारवाई करतील. मंडळांना न्यायालयाच्या नियमांचे पालन करून विसर्जन मिरवणूका काढाव्या लागणार आहेत. नियमांचं पालन केलं आणि योग्य खबरदारी घेतली तर यंदा हा उत्सव आनंदात साजरा होईल, असंही ते म्हणाले.
