लोकप्रवाह, चोपडा दि. ०३ आॕगस्ट – सन २०१४ – १५ मध्ये राष्ट्रीय ग्रामीण रोजगार हमी कायदा २००५ अंतर्गत महात्मा गांधी राष्ट्रीय ग्रामीण रोजगार हमी योजना अंतर्गत तब्बल १५ लाख रुपये खर्च करून तालुक्यांतील तावसे बु. येथील शेतकरी रविंद्र मुलचंद पाटील यांच्या शेतापासून ते अशोक रामचंद्र जाधव यांच्या शेतापर्यंतचा शेतरस्ता फक्त कागदोपत्री झाल्याचे आढळून आले आहे. मात्र प्रत्यक्षात सदर शेत रस्ता झालाच नाही. हा संपूर्ण प्रकार माहिती अधिकारात उघड झाला आहे.
सदर रस्ता प्रत्यक्षात झालाच नाही म्हणून सदर रस्ता व कामाची चौकशी व्हावी यासाठी संदीप अमृत बाविस्कर यांनी २१/ १२/ २०१८ रोजी जिल्हाधिकारी यांच्याकडे तक्रार अर्ज दाखल केला होता. तसेच २७ जुलै रोजी रमेश भिला कोळी यांनी मुख्य कार्यकारी अधिकारी व जिल्हाधिकारी यांच्याकडे रस्त्याच्या चौकशीसाठी तक्रार अर्ज दाखल केला आहे. तर २८ जून रोजी पत्रकार राजेंद्र पाटील यांनी देखील माहितीचा अधिकार अर्ज टाकला होता.
सदर रस्ता प्रत्यक्षात झालाच नाही. तर तत्कालीन सरपंच, ग्रामसेवक, ग्रामरोजगार सेवक व अधिकारी यांनी संगनमत करून सदर रस्त्याचे व नाल्यावरील पुलाचे प्रत्यक्ष काम न करता फक्त कागदावरच केलेले दिसून येत आहे. सदरील रस्त्याच्या कामात शासनाची फसवणूक करून लाखो रुपयांचा भ्रष्टाचार झालेला आहे. तरी संबंधितांची चौकशी होऊन गुन्हेगारांवर फौजदारी गुन्हा दाखल करण्यात यावा अशी मागणी आता जोर धरू लागली आहे. सदर रस्ता व कामाची चौकशी न केल्यास गटविकास अधिकारी कार्यालायासमोर आमरण उपोषणाचा इशारा तक्रारदार यांनी दिला आहे.
