लोकप्रवाह, चोपडा दि. ०६ आॕगस्ट – येथील शहरी प्राथमिक आरोग्य केंद्र म्हणजेच नगरपरिषद रुग्णालय येथे भगिनी मंडळ नर्सिंग कॉलेजच्या वतीने 1 ऑगस्ट ते 7 ऑगस्ट दरम्यान जागतिक स्तनपान सप्ताहानिमित्त विविध उपक्रमांनी जनजागृती करुन जागतिक स्तनपान सप्ताह साजरा करण्यात आला. नर्सिंग कॉलेजच्या विद्यार्थिनींनी रोशनी खाटिक, गायत्री धनगर व नैना मराठे यांनी “स्तनपानाचे महत्व” या विषयाबाबत गरोदर मातांमध्ये जाणीव निर्माण करून त्याविषयीच्या शंका व गैरसमज दूर केले.
बाळाला योग्य वयात व पुरेसे स्तनपान देण्याबाबत मातांना माहिती देऊन चित्र प्रदर्शन घेण्यात आले.
तसेच नवजात शिशुंच्या आरोग्यासाठी, शारीरिक व बौद्धिक विकासासाठी सुद्धा बाळास स्तनपान देणे किती फायद्याचे आहे हे यावेळी सांगण्यात आले. बाळाची वाढ व विकासविषयक गरज भागविण्यासाठी योग्य प्रमाणात प्रथिने, कर्बोदके, स्निग्ध पदार्थ, खनिजे, जीवनसत्वे व पाणी यासारख्या अन्न घटकांचे सर्वोत्तम संतुलन मातेच्या दुधामुळे बाळास प्राप्त होते. स्तनपान हे बाळाचे पहिले लसीकरण आहे असे मानले जाते त्यामुळे जंतुसंसर्गविरुद्ध संरक्षण मिळते. बाळाला त्याच्या वयाच्या पहिल्या सहा महिन्यापर्यंत फक्त आईचे दूधच द्यावे. जन्मानंतर लगेच अर्ध्या तासात बाळाला अंगावर पाजण्यास मातेने सुरुवात करण्याची गरज आहे. बाळाला स्तनपान लवकर सुरू केल्याने आई व बाळाचे भावनिक नाते निर्माण होते. ही बाळाचा विकास व शिक्षणाची पहिली पायरी आहे. याप्रकारे स्तनपान सप्ताहाबद्दल सखोल मार्गदर्शन गरोदर माता यांना यावेळी देण्यात आले.
कार्यक्रम यशस्वीतेसाठी शहरी आरोग्य केंद्राचे वैद्यकीय अधिकारी डॉ.चंद्रकांत बारेला, संस्थेच्या अध्येक्षा पुनम गुजराथी यांच्या मार्गदर्शनाखाली प्रा. अशफाक पिंजारी, भगिनी मंडळ नर्सिंग कॉलेज येथील प्रशिक्षणार्थी व नगरपरिषद रुग्णालयातील सर्व कर्मचाऱ्यांनी परिश्रम घेतले.
