लोकप्रवाह, चोपडा दि. ०९ आॕगस्ट – येथील महात्मा गांधी शिक्षण मंडळ संचलित ऑक्सफर्ड इंग्लिश मीडियम स्कूल येथे स्वातंत्र्याच्या अमृत महोत्सवी वर्षानिमित्त आज रोजी सामूहिक राष्ट्रगीताचे गायन करण्यात आले.
सकाळी 11 वाजता सर्व विद्यार्थी, शिक्षक व शिक्षकेतर कर्मचारी या सर्वांनी मिळून राष्ट्रगीताचे गायन केले. स्वराज्य महोत्सवाचा एक भाग म्हणून या राष्ट्रगीत गायनाच्या कार्यक्रमास मोठ्या संख्येने विद्यार्थी उपस्थित होते. ९ ऑगस्ट हा दिवस क्रांती दिन म्हणून साजरा केला जातो. ९ ऑगस्ट १९२५ या दिवसाला भारतीय इतिहासात एक महत्वपूर्ण स्थान आहे. या दिवशी काकोरी कांडाच्या माध्यमातून क्रांतिकारकांनी इंग्रजांविरुद्ध लढा पुकारला. तसेच ९ ऑगस्ट १९४२ या दिवसापासून भारत छोडो आंदोलनास सुरुवात झाली. शाळेतील शिक्षिका सुचिता पाटील यांनी विद्यार्थ्यांना क्रांती दिनाविषयी
विस्तृत माहिती सांगितली. तत्पूर्वी शाळेच्या मुख्याध्यापिका ममता कपिल न्याती यांच्या हस्ते स्वातंत्र्य सेनानींच्या प्रतिमांचे पूजन करण्यात आले.
कार्यक्रमाच्या यशस्वीतेसाठी मुख्याध्यापिका ममता कपिल न्याती यांच्या मार्गदर्शनाखाली सर्व शिक्षक व शिक्षकेतर कर्मचाऱ्यांनी परिश्रम घेतले.
