लोकप्रवाह, चोपडा दि. २० आॕगस्ट – येथील तालुका फोटोग्राफर असोसिएशन च्या वतीने दिनांक 19 ऑगस्ट रोजी अग्रसेन भवन येथे जागतिक फोटोग्राफी दिवस हा विविध उपक्रमांनी साजरा करण्यात आला. कार्यक्रमाच्या अध्यक्षस्थानी चोसाकाचे माजी चेअरमन अॕड. घनश्याम पाटील हे होते तर व्यासपीठावर राष्ट्रवादीचे नेते जीवन चौधरी, पोलीस निरिक्षक अवतारसिंग चव्हाण, जेष्ठ कवी अशोक सोनवणे, सुतगिरणी संचालक तुकाराम पाटील, भाजप शहराध्यक्ष गजेंद्र जैस्वाल, जेष्ठ फोटोग्राफर राजेंद्र पाटील, छोटु वारडे, पत्रकार संदिप ओली व पोस्ट आॕफीसचे अधिकारी यांची उपस्थिती होती.
कार्यक्रमाच्या सुरुवातीला मान्यवरांच्या हस्ते दिपप्रज्वन व कॕमेरापुजन करण्यात आले. तदनंतर सर्व उपस्थित मान्यवरांचे स्वागतरुपी सत्कार करण्यात आले. यावेळी सर्व उपस्थितांना पोस्ट आॕफीस बँकेचे व्यवस्थापक यांनी अपघात विम्याबद्दल विस्तृत माहिती दिली. त्यानंतर पोलीस निरिक्षक अवतारसिंग चव्हाण, गटनेते जीवन चौधरी व जेष्ठ कवी अशोक सोनवणे यांनी मनोगते व्यक्त करीत उपस्थितांना फोटोग्राफी दिनाच्या शुभेच्छा दिल्या. अध्यक्षीय भाषणातून बोलतांना अॕड. घनश्याम पाटील यांनी फोटोग्राफीचे आपल्या आयुष्यात किती महत्व आहे हे विषद करुन सांगितले.
यावेळी शहरातील व ग्रामीण भागातील सर्व फोटोग्राफर बांधवांची उपस्थिती होती. कार्यक्रमाचे प्रास्ताविक छोटु वारडे यांनी तर सुत्रसंचालन व आभारप्रदर्शन जेष्ठ कवी व साहित्यिक रमेश जे. पाटील यांनी केले. तसेच कार्यक्रम यशस्वीतेसाठी सर्व फोटोग्राफर बांधवांनी परिश्रम घेतले. कार्यक्रम आटोपल्यानंतर सर्वांनी स्नेहभोजनाचा आस्वाद घेतला.
