अवैध लाकूडांचे चार ट्रक पकडण्यात पोलीसांना यश; चाळीसगांव ग्रामीण पोलीसांची दमदार कारवाई..!
लोकप्रवाह, चाळीसगांव दि. ११ जून – मिळालेल्या गुप्त माहितीनुसार व पोलीस अधिक्षक यांच्या आदेशाने सुरु असलेल्या आॕल आऊट मोहिमे दरम्यान तयार करण्यात आलेल्या वेगवेगळ्या पथकांना नाकाबंदी दरम्यान मालेगांव रोड, वाघळी रोड व धुळे रोड आदि ठिकाणी अवैध लाकुड वाहतुक करणारे चार ट्रक पकडण्यात चाळीसगांव ग्रामीण पोलीसांना यश आले. पुढील कारवाईकरीता सदर जप्त केलेली वाहने लाकुडांसह वनविभागाच्या ताब्यात देण्यात आली.
याबाबत सविस्तर वृत्त असे की, चाळीसगांव ग्रामीण पोलीस स्टेशनचे पोलीस निरिक्षक संजय ठेंगे यांना गुप्त माहिती मिळाली की, चार ट्रकांमधून चंदन लाकुडाची वाहतूक होणार आहे. म्हणून त्यांनी वेगवेगळी पथके हि वाघळी रोड, मालेगांव रोड व धुळे रोड या ठिकाणी पाठविली. व सर्व ठिकाणी नाकाबंदी करण्यात आली. या दरम्यान वाघळी रोड बोरखेडा जवळ MH-18, M – 6778 व MH-18, BG-2918 या ट्रकांची पाहणी केली असता त्यामध्ये अवैध निंब व बाभळीचे लाकुड असल्याचे निदर्शनास आले. तसेच धुळे रोड बायपास येथे नाकाबंदी दरम्यान MH-04 S-3288 व मालेगांव रोड येथील पथकास MH-19, K-8274 या ट्रकांमध्ये सुद्धा अवैध लाकुड वाहतुक करीत असल्याचे निदर्शनास आले. चालकांची नांवे इमरान खाँ जब्बार खान व मुतालिब खाँ लियाकत खान दोघेही रा.मालेगांव तसेच नईम शेख कयुम शेख रा. उंबरखेडे, चाळीसगांव व सद्दाम सैयद हसन अशी आहेत. तर वाहन मालकांची नांवे मजहर खान, अलीम खान व कादीर सैय्यद सर्व रा. मालेगांव अशी आहेत.
सदर कारवाई पोलीस अधिक्षक डॉ. प्रविण मुंढे, अप्पर पोलीस अधिक्षक रमेश चोपडे व उपविभागीय पोलीस अधिकारी भरत काकडे यांच्या मार्गदर्शनाखाली व पोलीस निरीक्षक संंजय ठेंगे यांच्या नेतृत्वाखाली सपोनि. रमेश चव्हाण, सपोनि. डि.व्हि. सुंदरडे, पोहेकाॕ. युवराज नाईक, पोना. गोवर्धन बोरसे, शांताराम पवार, संदीप पाटील, नितीन आमोदकर, ज्ञानेश्वर बडगुजर, देविदास पाटील, नंदू परदेशी, संतोष शिंदे, पोना. चालक मनोहर पाटील आदिंनी केली.
