लोकप्रवाह, चोपडा दि. ८ आॕगस्ट – येथील प्रताप विद्या मंदिरात गुणवंतांचा सत्कार सोहळा आयोजित करण्यात आला होता. याप्रसंगी बोलताना संस्थेच्या सचिव माधुरी मयूर म्हणाल्या की दुसऱ्याच्या तालावर नाचण्यापेक्षा स्वतःचा ताल ओळखा, सुर शोधा व जिवनाचा आनंद घ्या. ज्ञानाचा उपयोग विध्वंसक कार्याऐवजी विधायक गोष्टींच्या निर्मितीसाठी केल्यास सृजनशीलता जन्मास येते. गुणवंत विद्यार्थ्यांनी सकारात्मक यशाकडे वाटचाल करत असतानाच वेळप्रसंगी अपयश आले तरी ते पचवण्याची तयारी ठेवायला हवी. अपयशाने खचून न जाता पुन्हा उभे रहा असे आवाहनही यावेळी त्यांनी केले. यावेळी व्यासपीठावर संस्थेचे उपाध्यक्ष विश्वनाथ अग्रवाल, कार्यकारी संचालक चंद्रहासभाई गुजराथी, रमेश जैन, मुख्याध्यापक पी.एस.गुजराथी, पर्यवेक्षक एस.एस.पाटील, माधुरी पाटील, उपप्राचार्य जे.एस.शेलार, संस्थेचे समन्वयक गोविंद गुजराथी आदिंसह पालक उपस्थित होते.
प्रताप विद्या मंदिरात इयत्ता दहावी व बारावीच्या परीक्षेत यश प्राप्त करणाऱ्या गुणवंत विद्यार्थ्यांचा तसेच इतिहास प्रज्ञाशोध परीक्षा व एन.एम. एम.एस. परीक्षा यामध्ये यश प्राप्त केलेल्या गुणवंत विद्यार्थ्यांचे सत्कार यावेळी करण्यात आला. शिक्षक दिनाचे औचित्य साधत पंकज नागपुरे, पंकज शिंदे, एन.वाय.मलिक, अकमल शेख, जावेद शेख, शाहीन सैयद या गुणवंत शिक्षकांचे सत्कार देखील यावेळी करण्यात आले.
कार्यक्रमाच्या प्रास्ताविकात मुख्याध्यापक पी.एस. गुजराथी यांनी शाळेच्या यशस्वी वाटचालीचा आढावा घेतला. सूत्रसंचालन टी. ई. लोहार यांनी तर आभार प्रदर्शन जे. एस. शेलार यांनी केले. पंकज नागपुरे आणि प्रदीप कोळी यांच्या कलादालन विभागाने ईशस्तवन सादर केले.
