लोकप्रवाह, चोपडा दि.८ आॕगस्ट – शिक्षकाची भावना आणि भूमिका विद्यार्थ्यांचे व्यक्तिमत्व घडवत असते. प्रत्येक शिक्षकाला आई होता आले पाहिजे. शिक्षकाच्या ठायी वक्ता, नेता व अभिनेता या त्रिगुणांचा सुरेख संगम असला पाहिजे. स्पर्धेच्या युगामध्ये विचारांचे अधोरेखन होणे आवश्यक आहे आणि त्यासाठी शिक्षकांनी सातत्याने प्रयत्नशील असले पाहिजे, असे विचार प्रसिद्ध साहित्यिक व कवी प्रा. वा. ना. आंधळे यांनी व्यक्त केले. ते आनंदराज पॅलेस येथे रोटरी क्लब ऑफ चोपडा तर्फे शिक्षक दिनानिमित्त आयोजित ‘नेशन बिल्डर अवॉर्ड-२०२२’ वितरण सोहळ्यात बोलत होते. याप्रसंगी मंचावर रोटरीचे सहप्रांतपाल रोटे. नितीन अहिरराव, चोपडा रोटरीचे अध्यक्ष रोटे.ॲड. रुपेश पाटील, सचिव रोटे.गौरव महाले प्रकल्प प्रमुख रोटे.आरिफ शेख हे उपस्थित होते.
यावेळी उपस्थित शिक्षक व पालकांना मार्गदर्शन करताना प्रा.आंधळे म्हणाले, कवितेतून आपले व्यक्तिमत्व घडत असते. तात्विक, अर्थपूर्ण आणि गेय कविता आयुष्य घडवतात. जन्मापासून ते मृत्यूपर्यंत गाण्याचे आपल्या जीवनात अनन्यसाधारण महत्त्व आहे. कवितेतील सुरावट हरवू नये कविता ही आपली तसेच संस्कृतीची देखील आई आहे. आजकाल कविता लक्षात राहत नाहीत याचा अर्थ कवीचे सूर हरवले आहेत का? असा प्रश्न पडतो. अनेक कविता व विनोदी किस्स्यांची मिश्किलपणे पेरणी करत त्यांनी उपस्थितांना मार्गदर्शन केले.
याप्रसंगी देविदास हिरामण महाजन (झि.तो.महाजन माध्यमिक व उच्च माध्यमिक विद्यालय, धानोरा), प्रविण आबाजीराव पाटील (आईसाहेब चिंधाबाई निंबाजी पाटील माध्यमिक विद्यालय, माचले), संजय हरी पाटील (श्री गुरुदेव माध्यमिक विद्यालय, कोळंबा), अजिजखान समद खान (अँग्लो उर्दू हायस्कूल, अडावद), शीला सुनील देशमुख (माध्यमिक विद्यालय, चुंचाळे), राजश्री किशोर पवार (कुरवेल हायस्कूल, कुरवेल), जगदीश शांतीलाल महाजन (धनाजी नाना आदिवासी आश्रमशाळा, सत्रासेन), किरण सुपडु पाटील (माध्यमिक आश्रमशाळा, बोरअजंटी), भास्कर शंकरराव पाटील (जि प शाळा, खेडीभोकरी), आशा मधुकर पाटील (श्री शिवाजी आदर्श प्राथमिक केंद्रशाळा, हातेड), सुजाता सुरेश पाटील (पंडीत जवाहरलाल नेहरू प्राथमिक शाळा, अकुलखेडे), ज्ञानेश्वर शांतीलाल निकम ( जि प शाळा, उनपदेव), मधुकर शांताराम भोई (आश्रमशाळा प्राथमिक, धानोरा), किरण रघुनाथ पाटील (उच्च माध्यमिक आश्रमशाळा, कर्जाणे), भारती अधिकराव पाटील (प्राथमिक आश्रमशाळा, हातेड), डॉ सोनल प्रमोद पाटील (ग.ह.रायसोनी इन्स्टिटयूट ऑफ इंजिनीरिंग आणि बिसनेस मॅनेजमेंट,जळगाव) आदिंना नेशन बिल्डर अवॉर्ड २०२२ या पुरस्काराने सन्मानित करण्यात आले.
तसेच रोटरीतील शिक्षक सदस्यांचाही यावेळी सन्मान करण्यात आला. रोटरी क्लब ऑफ चोपडा व आनंद सुपर शॉपी तर्फे आयोजित पर्यावरण पूरक श्रीगणेश आरास स्पर्धेचे बक्षीस वितरणही यावेळी करण्यात आले. या पुरस्कार वितरण सोहळ्याचे सूत्रसंचालन संजय बारी यांनी तर प्रास्ताविक रोटे. ॲड. रुपेश पाटील यांनी केले वक्त्यांचा परिचय प्रा. डॉ. किशोर पाठक यांनी व आभार प्रदर्शन सचिव रोटे. गौरव महाले यांनी केले. कार्यक्रमास मोठ्या संख्येने शिक्षक, पालक व रोटरी सदस्य उपस्थित होते.
