लोकप्रवाह, दि. १५ सप्टें चोपडा – विधानसभेच्या आमदार लता सोनवणे यांच्याकडून गुरांना होणाऱ्या लंपी आजार तसेच तालुक्यात होत असलेल्या अति पावसामुळे कापूस, उडीद, मूग व सोयाबीन पिकांचे होणारे नुकसान व दुष्परिणामाबाबत सर्व विभागातील प्रमुख अधिकाऱ्यांकडून माहिती घेवून त्यावर उपाययोजना करणेकामी आढावा बैठक घेण्यात आली.
यावेळी १३ तास व ७० किलोमीटर तापी नदीत पोहत आपला जीव वाचविणाऱ्या कोळंबा येथील लता कोळी यांचा आमदार लता सोनवणे यांच्याकडून साडी चोळी देऊन सत्कार करण्यात आला. व त्यांनी दाखविलेल्या धैर्याचे यावेळी कौतुक करण्यात आले.
गुरांना होणाऱ्या लंपी आजारावरील लसीकरण लवकरात लवकर करून इतर गुरांना त्याचा संसर्ग होवु नये म्हणून काळजी घेण्याची सूचना संबंधित अधिकाऱ्यांना देण्यात आल्या. मंडळनिहाय पावसाचे प्रमाण, होणारे नुकसान तसेच ऊस पिकावरील पांढरी माशीबाबत माहिती घेऊन योग्य ती खबरदारी घेण्याचे निर्देशही यावेळी देण्यात आले.
सदर आढावा बैठकीस माजी आमदार प्रा. चंद्रकांत सोनवणे, मंगला पाटील, सुकलाल कोळी, दिपक चौधरी, सुनील पाटील, गोरख कोळी, तहसीलदार अनिल गावित, गटविकास अधिकारी भरत कोसोदे, तालुका कृषी अधिकारी दिपक साळुंखे, पशुसंवर्धन अधिकारी डाॅ.व्ही.ई.तडवी आदींची यावेळी उपस्थिती होती.
