लोकप्रवाह, चोपडा दि. १६ – सद्या संपुर्ण देशात गुरांना होणाऱ्या लम्पी या आजाराने थैमान घातले आहे. खेड्यापाड्यातील अनेक पशुपालकांचे पशुधन विशेषतः गाई, वासरू, बैल आणि काही प्रमाणात म्हशी या रोगाला बळी पडतांना दिसत आहे. देशातील १२ राज्यातील १६५ जिल्ह्यात ११.२५ लाख गाई-म्हशींमध्ये या रोगाचा प्रादुर्भाव झाला आहे. साधारणपणे ५० हजार जनावरांचा यामध्ये मृत्यू झाला आहे.
या लम्पी रोगाविरुद्धही संघटितपणेच लढावे लागेल म्हणून रोटरी क्लब चोपडा, RCC क्लब बोरअजंटी व बोरअजंटी येथील पशुवैद्यकीय दवाखाना यांच्या सहकार्याने घरोघरी जाऊन गुरांना मोफत लम्पी या आजारावर प्रतिबंध म्हणुन लसीकरण शिबीर राबविण्यात आले. सदर लसीकरण डॉ ज्ञानदेव दातीर व त्यांचे सहकारी यांच्या मदतीने राबविण्यात आले. यावेळी जवळपास ६०० गुरांचे लम्पी स्किन लसीकरण करण्यात आले.
सदर शिबिराला रोटरी अध्यक्ष ॲड.रुपेश पाटील, प्रकल्प प्रमुख स्वप्नील महाजन, चंद्रशेखर साखरे, प्रदीप पाटील, नयन महाजन, RCC अध्यक्ष श्रीकृष्ण बोरसे, ग्रामसेवक देवरे, पोलीस पाटील व ग्रामस्थ उपस्थित होते.
