लोकप्रवाह, चोपडा दि. १७ – तालुक्यातील सकल नाभिक समाजाच्यावतीने परभणी जिल्ह्यातील जिंतूर तालुक्यामध्ये सेलू या गावी माणुसकीला काळीमा फासणारे कृत्य घडले. नाभिक कुटुंबातील एका 11 वर्षाच्या चिमुरडीवर गावातीलच अंगद घुले आणि तुकाराम घुले या दोन नराधमांनी पाशवी बलात्कार केला आहे. याप्रकरणी जिंतूर पोलिसांनी दोन्ही नराधमांना अटक केली आहे. या आरोपींना कठोर शिक्षा होवून चिमुरडीला न्याय मिळावा या मागणीचे निवेदन चोपडा तहसीलदार यांना देण्यात आले.
या घटनेमुळे संपूर्ण महाराष्ट्रातील नाभिक समाजात व इतर समाजातही संतापाची लाट उसळली आहे. पिडीत मुलीला व तिच्या कुटुंबीयांना योग्य न्याय मिळावा आणि आरोपींना कठोरात कठोर शिक्षा व्हावी यासाठी जळगाव जिल्ह्यातील चोपडा तालुक्यातील सर्व नाभिक समाजाच्या वतीने या घटनेचा निषेध म्हणून एक दिवस सलून व्यवसाय बंद ठेवण्यात आला. या प्रकरणातील आरोपी दोन्ही नराधमांना न्यायोचीत शिक्षा होईल अशा प्रकारच्या कारवाई करण्याची शिफारस देऊन चिमुकलीला आणि तिच्या कुटुंबीयांना न्याय मिळवून देण्याची मागणी निवेदनाद्वारे करण्यात आली. सदर निवेदन प्रभारी नायब तहसीलदार रविंद्र माळी यांनी स्विकारले.
यावेळी महाराष्ट्र नाभिक महामंडळचे जळगांव जिल्हा उपाध्यक्ष उमाकांत निकम, जिल्हा सदस्य ज्ञानेश्वर सोनवणे, तालुकाध्यक्ष रविंद्र सैंदाणे, उपाध्यक्ष अनिल पवार, हिरालाल सोनवणे, सचिव राजेंद्र येशी, शहराध्यक्ष सोपान बाविस्कर, उपाध्यक्ष शत्रुघ्न सोनवणे, सचिव विलास निकम, मनोहर सोनगिरे, राजेंद्र सोनगिरे, बापु पवार, भिकाजी ठाकरे, दिलीप शिरसाठ, निलेश निकम, राहुल निकम, योगेश सोनवणे, गोकुळ सोनवणे, किशोर सैंदाणे, रविंद्र जाधव, जिवा महाले संघटना अध्यक्ष देविदास बाविस्कर, उपाध्यक्ष धनराज पगारे, सचिव गणेश खोंडे, प्रमोद बाविस्कर, प्रदिप बाविस्कर, अनिल सैंदाणे, पंढरीनाथ शिरसाठ, भुषण जगताप, दिनेश जगताप, दत्तात्रय बाविस्कर आदिंसह समस्त नाभिक समाजबांधवांची उपस्थिती होती.
