लोकप्रवाह, चोपडा दि. १७ – येथील महात्मा गांधी शिक्षण मंडळ संचलित ऑक्सफर्ड इंग्लिश मीडियम स्कूल मध्ये रंगभरण स्पर्धेचे यशस्वी आयोजन करण्यात आले. रंगोत्सव सेलिब्रेशन, मुंबईतर्फे राष्ट्रीय पातळीवर आयोजित केलेल्या या स्पर्धेमध्ये शाळेतील तब्बल 400 विद्यार्थ्यांनी सहभाग नोंदवला.
विद्यार्थ्यांच्या कलागुणांना वाव देण्यासाठी रंगभरण, हस्ताक्षर, कोलाज काम, फोटोग्राफी, स्केचींग यांसारख्या विविध स्पर्धांचे आयोजन केले जाते. शाळेतील विद्यार्थ्यांनी रंगभरण, कोलाज काम आणि हस्ताक्षर स्पर्धेमध्ये मोठ्या संख्येने सहभाग नोंदविला. शाळेतील कला शिक्षक शकील अहमद यांनी या स्पर्धेचे यशस्वी आयोजन केले. त्यासाठी त्यांना शाळेच्या मुख्याध्यापिका ममता कपिल न्याती यांचे मार्गदर्शन लाभले. स्पर्धेच्या यशस्वी आयोजनासाठी शाळेतील सर्व शिक्षक व शिक्षकेतर कर्मचाऱ्यांचे सहकार्य लाभले.
