लोकप्रवाह, चोपडा दि. १८ सप्टें. – येथील शासकीय औद्योगिक प्रशिक्षण संस्था येथे दिनांक 17 सप्टेंबर रोजी भगवान विश्वकर्मा जयंती निमित्ताने पदवी प्रदान समारंभ आयोजित करण्यात आला. कार्यक्रमाच्या अध्यक्षस्थानी प्राचार्य एस. एन. भोई तर प्रमुख अतिथी म्हणून दिपक मिस्त्री (सिनीयर मॕनेजर, सुप्रीम पाईप) यांची उपस्थिती होती. कार्यक्रमाची सुरुवात सरस्वती पूजन व भगवान विश्वकर्मा यांच्या प्रतिमेस पुष्पहार अर्पण करून करण्यात आली.
अखिल भारतीय व्यवसाय ऑगस्ट 2022 परीक्षेत प्रथम, द्वितीय व तृतीय क्रमांकाने उत्तीर्ण झालेल्या विद्यार्थ्यांना प्रमुख मान्यवरांच्या हस्ते अंतिम प्रमाणपत्र देऊन गौरविण्यात आले. अनेक पालक यावेळी उपस्थित होते. विद्यार्थ्यांनी संधीचं सोनं कशा पद्धतीने करावे व प्रत्येक परिस्थितीवर कशा पद्धतीने मात करावी हे आर. ए. पाटील यांनी आपल्या मनोगतातून व्यक्त केले. तसेच रोजगार करण्यापेक्षा स्वयंरोजगार कसा उभा करता येईल याचेही अनमोल मार्गदर्शन दीपक मिस्त्री यांनी विद्यार्थ्यांना केले. शासकीय औद्योगिक प्रशिक्षण संस्थेचे प्राचार्य एस.एन.भोई यांनी देखील विद्यार्थ्यांना अप्रेंटीस बद्दल मोलाचे मार्गदर्शन केले.
कार्यक्रमाचे प्रास्ताविक, सुत्रसंचालन व आभारप्रदर्शन सुहास जोशी यांनी केले. कार्यक्रम यशस्वीतेसाठी बेबी चौधरी, सुनिता इंगळे, आप्पासाहेब उगले, अनिल चव्हाण, अजय चव्हाण, प्रशांत पाटील, संतोष ठाकुर आदिंसह शिक्षक व शिक्षकेतर कर्मचारी यांनी परिश्रम घेतले.
