लोकप्रवाह, चोपडा दि.१८ – शहरात असणाऱ्या अभ्यासक्रमाच्या संधी ग्रामीण भागात मिळाल्या तर ग्रामविकासाच्या अनेक संधी उपलब्ध होतील, व्यावसायिक अभ्यासक्रमाच्या शिक्षणातून ग्रामीण भागात ग्रामविकासाला मदत होईल, घोडगाव परिसरातील विद्यार्थ्यांनी या अभ्यासक्रमाचा फायदा घ्यावा असे प्रतिपादन पदवी प्रदान समारंभाचे अध्यक्ष, नूतन शिक्षण प्रसारक मंडळाचे अध्यक्ष व चोपडा पीपल्स बँकेचे चेअरमन चंद्रहासभाई गुजराथी यांनी केले.
कार्यक्रमाच्या प्रारंभी सरस्वतीपूजन व भगवान विश्वकर्मा यांच्या प्रतिमेचे पूजन करण्यात आले. इयत्ता ६ वीच्या विद्यार्थी व विद्यार्थिनींनी स्वागतगीत सादर केले. याप्रसंगी व्यासपीठावर नूतन शिक्षण प्रसारक मंडळाचे सचिव जवरीलाल जैन, सहसचिव भानुदास पाटील, संचालक पी.एच.महाजन, आर.एस.पाटील, आर.ओ.पाटील यांच्यासह कुसूंबे गावाचे माजी सरपंच मणीलाल पाटील, घोडगाव विविध कार्यकारी सोसायटीचे माजी चेअरमन विनोद पाटील, सी.बी. निकुंभ हायस्कुलचे मुख्याध्यापक आर.पी.चौधरी, एसएनआरजी आयटीआयचे प्राचार्य भरत पाटील उपस्थित होते.
यावेळी शैक्षणिक वर्ष २०२०-२१ या वर्षाचा एकूण निकाल ७८℅ लागला आहे त्यात इलेक्ट्रिशियन ट्रेडला नागेश पाटील प्रथम, मनस्वी बाविस्कर द्वितीय, खुशाल बाविस्कर तृतीय तर फिटर ट्रेडला प्रथम रौनक पाटीदार, द्वितीय ऋषिकेश पाटील यांचा मान्यवरांच्या हस्ते सत्कार करण्यात आला.
कार्यक्रमाचे सूत्रसंचलन जे.ए.पाठक यांनी तर आभारप्रदर्शन अविनाश सूर्यवंशी यांनी केले. कार्यक्रम यशस्वीरित्या पार पाडण्यासाठी प्राचार्य भरत पाटील व मितेश पाटील यांच्या मार्गदर्शनाखाली शिक्षक व शिक्षकेतर कर्मचारी यांनी परिश्रम घेतले.
