लोकप्रवाह, चोपडा दि. १८ – शतकोत्तर ज्ञानदानाचे कार्य करणाऱ्या चोपडा एज्युकेशन सोसायटीच्या अध्यापक विद्यालयात प्रथम वर्षाला प्रवेश घेणाऱ्या विद्यार्थ्यांचा प्रवेशोत्सव व संस्थेच्या माजी सचिव स्व. संध्याताई मयूर यांच्या स्मृतीप्रित्यर्थ आयोजित व्हाॅलीबॉल स्पर्धेचे बक्षीस वितरण समारंभ दि.16 सप्टेंबर रोजी संपन्न झाला. सदर कार्यक्रमाच्या अध्यक्षस्थानी संस्थेच्या सचिव माधुरी मयूर होत्या. तर प्रमुख अतिथी म्हणून वर्धिष्णू फाउंडेशन, जळगाव या सामाजिक संस्थेचे संस्थापक अध्यक्ष अद्वैत दंडवते व अभियंता विनीत पाटील उपस्थित होते. ईशस्तवनाने कार्यक्रमाची सुरुवात झाली. त्यानंतर प्रथम व द्वितीय वर्षाच्या छात्राध्यापकांनी स्वागतगीत सादर केले. प्रास्ताविकात प्राचार्य किरण पाटील यांनी डी.एल.एड. ची प्रवेश प्रक्रिया, श्रद्धेय संध्याताई मयूर यांच्या स्मृतीप्रित्यर्थ दरवर्षी विद्यालयात वेगवेगळ्या स्पर्धांचे आयोजनाबाबत तसेच वायसीएमओयु. च्या बी.ए., डी.एस.एम. अभ्यासक्रमाच्या निकालाबाबत सांगितले. याप्रसंगी व्हॉलीबॉल स्पर्धेचा विजयी सकाळ विभाग संघ व उपविजयी गावातील विभाग संघ येथील शिक्षकांना मान्यवरांच्या हस्ते पारितोषिक प्रदान करण्यात आले व वायसीएमओयु.च्या डी. एस. एम. या अभ्यासक्रमाच्या परीक्षेमध्ये प्रथम येणारे प्रशांत एस. गुजराथी (मुख्याध्यापक, प्रताप विद्या मंदिर)यांचा सत्कार संस्थेच्या सचिव माधुरी मयूर यांच्या हस्ते करण्यात आला. विद्यालयातील कलाशिक्षिका मिनल पाटील यांनी स्व.संध्याताई मयूर यांच्या तयार केलेल्या पोर्ट्रेटचे अनावरण मान्यवरांच्या शुभहस्ते करण्यात आले.
यावेळी अद्वैत दंडवते यांनी आपल्या मनोगतात समाजातील कचरा वेचणाऱ्या आर्थिकदृष्ट्या दुर्बल मुला-मुलींसाठी ‘आनंदघर’ सुरू करून अशा मुलांना शिक्षणाच्या प्रवाहात आणून त्यांना त्यांचे हक्काचे शिक्षण देण्याचा व आनंददायी बालपण देण्याचा संस्थेचा उपक्रम समजावून सांगितला व पुढे हा उपक्रम समग्र जिल्ह्यात राबविण्याचा मानस त्यांनी यावेळी व्यक्त केला. चोपडा शहरात देखील अशा वंचित मुलांसाठी ‘आनंदघर’ चालविले जाते त्याचे कामकाज विनीत पाटील हे यशस्वीपणे पाहत आहेत.
कार्यक्रमाच्या अध्यक्षस्थानी असलेल्या संस्थेच्या सचिव माधुरी मयूर यांनी नवीन प्रवेशित विद्यार्थ्यांचे प्रातिनिधिक स्वागत केले व आपल्या अध्यक्षीय भाषणात त्यांनी विद्यार्थ्यांना सकारात्मक विचार करून अध्ययन करावे व उत्तमोत्तम असे गुण आत्मसात करावे, कारण आपणच भविष्यातील पिढी घडविणार आहात असे प्रतिपादन केले. त्यासोबतच वर्धिष्णू फाउंडेशन मध्ये समाजातील वंचित मुलांसाठी कशाप्रकारे कामकाज सुरू आहे याचा देखील उल्लेख केला.
यावेळी शिक्षणशास्त्र महाविद्यालयाचे प्राचार्य एम.पी. पाटील, औद्योगिक प्रशिक्षण संस्थेचे प्राचार्य भूषण पवार, प्रताप विद्या मंदिराचे मुख्याध्यापक प्रशांत एस. गुजराथी, उपप्राचार्य जे.एस.शेलार, पर्यवेक्षक एस. एस.पाटील, संस्थेचे समन्वयक गोविंद गुजराथी, माजी प्राचार्य प्रा.योगिता बोरसे, क्रिडा शिक्षक नरेंद्र महाजन, अभिजीत देसले, एजाज शेख, समाधान माळी, प्रा. मनोहर मराठे व केंद्रसहाय्यक महेंद्र एल.पटेल, प्रा. एस. एस. देशमुख, प्रा.मीनल पाटील, दिपक विसावे, संजय पाटील, जितेंद्र पाटील उपस्थित होते. कार्यक्रमाचे सूत्रसंचालन प्रा जयश्री पाटील यांनी तर आभार प्रदर्शन प्रा. स्वाती गुजराथी यांनी केले.
