लोकप्रवाह, चोपडा दि. २० – येथील शहर व तालुका काँग्रेसच्या वतीने दि. २० रोजी तहसीलदार यांना विविध मागण्यांचे निवेदन देण्यात आले. अतिवृष्टीमुळे शेतकऱ्यांच्या झालेल्या नुकसानीचे तात्काळ पंचनामे करावे तसेच ओला दुष्काळ जाहीर करुन शेतकऱ्यांना आर्थिक मदत द्यावी या मागणीचे निवेदन माजी जिल्हाध्यक्ष व नेते अॕड. संदिप सुरेश पाटील यांच्या मार्गदर्शनाखाली देण्यात आले. यावेळी शहर व तालुका काँग्रेसचे सर्व पदाधिकारी व कार्यकर्ते यांची उपस्थिती होती.
तालुक्यात सर्वदूर झालेल्या अतिवृष्टीमुळे शेतकऱ्यांचे प्रचंड नुकसान झाले आहे. यामध्ये कापूस पिकाच्या कैर्या सडल्यामुळे प्रचंड नुकसान झाले आहे. मका, बाजरी, ज्वारी, सोयाबीन, उडीद व मूग यासह सर्व पिकांचे नुकसान झाले आहे. या परिस्थितीमध्ये शेतकऱ्यांना आधार देणे हे अत्यंत जरुरीचे आहे. त्याकरीता शासनाने तातडीने झालेल्या नुकसानीचे पंचनामे करावे तसेच ओला दुष्काळ जाहीर करुन शेतकऱ्यांना तात्काळ आर्थिक मदत देण्यात यावी या मागणीचे निवेदन चोपडा शहर व तालुका काँग्रेसच्या वतीने देण्यात आले. सदर निवेदन नायब तहसीलदार सचिन बांबळे यांनी स्वीकारले. तात्काळ मदत उपलब्ध न केल्यास शहर व तालुका काँग्रेसतर्फे तीव्र आंदोलन करण्याचा इशारा यावेळी देण्यात आला.
यावेळी काँग्रेसचे तालुकाध्यक्ष प्रा. प्रदीप पाटील, शहराध्यक्ष के. डी. चौधरी, अशोक साळुंखे, शशिकांत साळुंखे, सुनील बोरसे, धनंजय पाटील ,जगतराव बोरसे, कांतीलाल पाटील, अल्पसंख्याक सेल अध्यक्ष प्रा. झिशान सैयद, संदीप बोरसे, नंदलाल शिंदे, एनएसयुआय प्रदेश सचिव चेतन बाविस्कर, घनश्याम पाटील, मधुकर विठ्ठल बाविस्कर, परिवहन सेल उत्तर महाराष्ट्र अध्यक्ष देवकांत चौधरी, घनश्याम पाटील, गोपाल नायदे, राहुल पाटील, समाधान कावीरे, कुणाल पारधी, इलियास पटेल आदींसह इतर पदाधिकारी आणि कार्यकर्ते मोठ्या संख्येने उपस्थित होते.
