लोकप्रवाह, चोपडा दि. २९ – तालुक्यातील सहकार क्षेत्रातील सर्वात मोठा प्रकल्प असलेला चोपडा सहकारी साखर कारखाना हा बारामती अॕग्रो यूनिट 4 ला भाड़ेतत्वावर देवून वर्ष लोटले गेले. या एका वर्षात कोणत्या न कोणत्या कारणास्तव कारखान्यातील वाद चव्हाट्यावर येत असल्याचे दिसून येत आहे. त्यातच आज दि. २९ सप्टेंबर रोजी चोपड़ा साखर कारखान्यात झालेल्या मासिक मीटिंगकडे तब्बल 13 संचालकांनी पाठ फिरविली असल्याची माहिती संचालक बाळासाहेब उर्फ विजय दत्तात्रय पाटील यांनी दिली. कारखान्यातील कुठल्याही विषयामध्ये संचालकांना विश्वासात न घेता चेअरमन व एमडी हे स्वतःची मर्जी चालवितात असा आरोप बाळासाहेब पाटील यांनी केला आहे.
बाळासाहेब पाटील यांनी मागील महिन्यात पत्रकार परिषद घेतली होती. त्यामध्ये त्यांनी जवळपास 26 विषय मांडून कारखान्यात मोठ्या प्रमाणावर भ्रष्टाचार झाला व सुरु असल्याचे सांगितले. अनेक मोठे गैरप्रकार कारखान्यात सुरु असुन संचालकाना विश्वासात न घेता मनमर्जीने स्वःहितासाठी चेअरमन व काही पदाधिकारी पदाचा गैरवापर करतांना दिसत आहेत असेही ते म्हणाले. सदर भ्रष्टाचार बाहेर काढण्यासाठी म्हणजेच चोसाकाच्या हितासाठी मी शेवटपर्यंत लढा देणार असल्याचे त्यांनी यावेळी सांगितले.
कारखान्यात झालेल्या संपूर्ण गैरव्यवहाराची चौकशी व्हावी याकरीता दि. २७ रोजी तहसीलदार यांना निवेदनाद्वारे मागणी करण्यात आली आहे. तसेच त्या निवेदनाच्या प्रती मुख्यमंत्री, उपमुख्यमंत्री, सहकार मंत्री, पालकमंत्री, माजी विधानसभाध्यक्ष अरुणभाई गुजराथी, माजी आमदार कैलास पाटील, काँग्रेस नेते अॕड. संदीप पाटील, जेडीसीसी संचालक घनश्याम अग्रवाल, जिल्हा निबंधक आदिंकडे पत्रव्यवहाराद्वारे पाठविण्यात आल्या आहेत. तरी याबाबत न्याय न मिळाल्यास लवकरच हजारोंच्या संख्येने शेतकरी व तालुकावासियांना सोबत घेवून उपोषण करणार असल्याची माहिती संचालक बाळासाहेब पाटील यांनी दिली.
