लोकप्रवाह चाळीसगांव, दि. ३० – चाळीसगांव ग्रामीण पोलीस स्टेशनच्या हद्दीत दिनांक 29/08/2022 रोजी कन्नड घाटात जय मल्हार पॉईंटच्या अलीकडे 100 मीटर खोल दरीत एक अनोळखी पुरुष जातीचे प्रेत मिळून आले होते. त्याबाबत चाळीसगांव ग्रामीण पोलीस स्टेशनला अकस्मात मृत्यू रजि. नं 49/2022 दाखल करण्यात आला होता. त्याचा तपासात तो खुन असल्याचे निष्पन्न होवून दोन जणांना जेरबंद करण्यात आले आहे.
याबाबत सविस्तर वृत्त असे की, सदर अनोळखी मयताचा चेहरा पूर्णपणे कुजलेला असल्याने त्याच्या चेहऱ्याचा फोटो काढून तो फोटोग्राफर अनिकेत जाधव याचेकडून डेव्हलप करुन चेहरा थोडा स्पष्ट केला गेला व त्यावरुन तसेच मयताच्या कपड्यांवरुन मयताची ओळख पटविण्यात ग्रामीण पोलीसांना यश आले. ते प्रेत मधूकर रामदास बुटाले वय 45, रा. न्यायनगर, पुंडलीक नगर, औरंगाबाद येथील रहिवासी असल्याचे समजले. त्याचे नातेवाईकांनी त्याचा काहीतरी घातपात झाला असल्याचा संशय व्यक्त केला. मयताच्या मारेकरीचा कोणताही मागमूस नसतांना सुद्धा चाळीसगांव ग्रामीण पोलीसांनी गतीने तपासाची चक्रे फिरविली. व गुप्त माहिती तसेच तांत्रिक विश्लेषणाच्या सहाय्याने दिनांक 30/09/2022 रोजी सदर मयताचे मारेकरी शोधून काढत त्यांना ताब्यात घेण्यात आले. सदर मयताचे मारेकरी हे मयताचा मेहूणा 1 ) गोपाल शंकर पंडीत, वय-32 व त्याचा मित्र 2) कृष्णा रामदास भोसले, वय-25, दोन्ही रा. औरंगाबाद हे आहेत. त्यांना पोलीसांनी चौकशीसाठी बोलविले असता सुरवातीला गोपाल पंडीत याने मयताची मुलगी धुळे येथे दिलेली असल्याने कदाचित तो औरंगाबाद येथून धुळे येथे जाण्यासाठी निघाला असावा व कन्नड घाटात उतरुन दारुच्या नशेत घाटात पडला असावा अशी माहिती देऊन दिशाभूल करण्याचा प्रयत्न केला. मात्र त्यांना पोलीसांनी विश्वासात घेऊन पुन्हा विचारपूस केली असता त्यांनी कबूल केले की, दिनांक 27/08/2022 रोजी वरील दोन्ही आरोपी हे मयतासोबत औरंगाबाद रामगिरी हॉटेल येथून गोपाल पंडीत याची रिक्षा क्र. एमएच-20-ईएफ-7984 यामध्ये बसून सावित्रीनगर मार्गे वरुड गावी जात असतांना 5000/- रुपये देण्याच्या वादावरुन कृष्णा भोसले व मयत मधूकर बुटाले यांचे चिखलठाणा पोस्टे. हद्दीत वरुड गावाजवळ रिक्षातच भांडण झाले व त्यातच कृष्णा भोसले याने मयत मधूकर बुटाले याचा गळा दाबून खून केला. त्यानंतर तो मयत झाल्याची खात्री झाल्यानंतर दोन्ही आरोपींनी मिळून त्याचे प्रेत रिक्षाने औरंगाबाद येथून कन्नड घाटात जय मल्हार पॉईंटजवळ दरीत फेकून दिले. सद्या दोन्ही आरोपी हे चाळीसगांव ग्रामीण पोलीसांच्या ताब्यात असून त्यांचेविरुध्द खूनाचा गुन्हा दाखल करण्यात आला आहे.
सदर कारवाई पोलीस अधीक्षक डॉ. प्रविण मुंढे, अपर पोलीस अधीक्षक रमेश चोपडे, उपविभागीय पोलीस अधिकारी भारत काकडे यांचे मार्गदर्शनाखाली व पोलीस निरिक्षक संजय ठेंगे यांच्या नेतृत्वाखाली सहाय्यक पोलीस निरीक्षक हर्षा जाधव, पोहेकाॕ. युवराज नाईक, पोना. शांताराम पवार, सफौ. राजेंद्र साळुंखे, पोहेकॉ. नितीन सोनवणे, पोना. शंकर जंजाळे, पोना. संदिप माने, पोना. मनोज पाटील, पोना. प्रेमसिंग राठोड, चालक सफौ. अनिल आगोणे आदिंच्या पथकाने केले.
